Skemat e garancive shtetërore dhe kthimi i kredive të marra nga bizneset përmes tyre do të trajtohen nga Agjencia e Kthimit të Garancive dhe Kredive. Ministria e Financave ka hedhur për konsultim projektligjin që synon krijimin e këtij institucioni me qëllim që ti shtohen funksione të administrimit të skemave të veçanta të garancive të lëshuara në kuadër të menaxhimit të situatës së COVID 19, apo skemave të tjera të ngjashme që mund të lëshohen në të ardhmen, si dhe i kalohet gjithashtu funksioni i ndjekjes së hapave për kthimin e garancive ekzistuese shtetërore, si dhe nënhuave.
Sipas relacionit, këto ndryshime merren në kushtet ku infrastruktura aktuale ligjore por edhe strukturore nuk i përgjigjet nevojave për raportimin, kontrollin, verifikimin dhe menaxhimin e të dhënave e të tjera aspekteve që shkojnë deri në rikuperimin e detyrimeve të bizneseve kundrejt buxhetit të shtetit që gjenerojnë nga këto lloj skemash. Dhe mesa duket qeveria ka hasur vështirësi në aplikimin e këtyre skemave dhe në korrektësinë e sipërmarrjeve për të paguar detyrimet.
Kështu agjencia ka si kompetencë që të mbledhë nga debitorët detyrimin për kredinë e marrë; të ndryshojë termat e kredisë që rrjedhin nga marrëveshja e lidhur midis institucionit financiar dhe debitorit; të shesë sendet e luajtshme apo të paluajtshme, të kaluara në pronësi të Agjencisë, personave të tretë fizike apo juridikë, me kapital jo shtetëror; të kërkojë nga organet gjyqësore dhe përmbarimore fillimin e procedurave të falimentit ose likuidimit kundrejt debitorëve; etj.
