Edhe 9 ditë afat për të përfituar nga falja me kusht e detyrimeve tatimore. Administrata Tatimore ka nisur zbatimin e procesit të faljes me kusht të detyrimeve tatimore të papaguara, ndërsa kanë mbetur vetëm edhe 9 ditë nga afati përfundimtar për të përfituar nga dispozitat e ligjit.
Tatimpaguesit që janë identifikuar si përfitues potencialë janë njoftuar përmes një mesazhi “pop-up” në llogaritë e tyre në sistemin e-Filing. Autoritetet ftojnë çdo subjekt të verifikojë situatën e tij financiare dhe, nëse është e nevojshme, t’u drejtohet Drejtorive Rajonale Tatimore për sqarime dhe asistencë.
Skema parashikon lehtësira të konsiderueshme për detyrimet e krijuara gjatë periudhës 2015-2019. Në rast se tatimpaguesi paguan 50% të detyrimit kryesor, pjesa tjetër prej 50% fshihet automatikisht. Po ashtu, ligji garanton faljen e plotë të gjobave dhe kamatëvonesave të akumuluara ndër vite, duke reduktuar ndjeshëm barrën financiare për bizneset dhe individët.
Ky mekanizëm, sipas Tatimeve, synon të krijojë një mundësi të re për subjektet që kanë mbetur me detyrime të papaguara, duke i nxitur ato të rikthehen në përputhje me detyrimet fiskale dhe të normalizojnë marrëdhëniet me administratën tatimore.
Një kusht thelbësor për përfitimin nga kjo skemë është dorëzimi i të gjitha deklaratave tatimore të padorëzuara deri më 31 dhjetor 2024. Sipas ligjit, afati i fundit për paraqitjen e tyre është 30 qershori 2026. Pa përmbushjen e këtij kriteri, subjektet nuk mund të përfitojnë nga falja e detyrimeve.
Me afatin që po afron, Administrata Tatimore u bën thirrje tatimpaguesve të mos presin ditët e fundit, por të verifikojnë menjëherë statusin e tyre në e-Filing dhe të ndërmarrin hapat e nevojshëm për të përfituar nga një mundësi që mund të sjellë kursime të konsiderueshme financiare dhe mbylljen përfundimtare të detyrimeve të vjetra tatimore.
