Morgan Stanley së shpejti do të hapë një kanal kyç të menaxhimit të pasurisë për agjentët e inteligjencës artificiale nga mijëra korporata, mësoi ekskluzivisht CNBC. Ky është një nga rastet e para kur një bankë e madhe e Wall Street-it hap platformat e saj për mjete të jashtme të inteligjencës artificiale.
Lëvizja do t’u lejojë agjentëve autonomë të klientëve të marrin të dhëna dhe analiza drejtpërdrejt nga platformat e administrimit të aksioneve të firmës, ShareWorks dhe Equity Edge, duke anashkaluar ndërfaqet tradicionale të programeve kompjuterike të ndërtuara për përdorues njerëzorë, sipas Mark Mitchell, drejtori i produkteve në Morgan Stanley at Work.
Në prill, drejtuesit e Morgan Stanley i atribuuan strategjisë së saj në vendin e punës mbledhjen e 1.2 trilionë dollarëve në asete.
“Mënyra se si e shohim ne, në një gjendje të ardhshme, klientët tanë korporativë nuk do të hyjnë më në ShareWorks apo Equity Edge”, tha Mitchell.
Në vend të kësaj, ata do të përdorin “mjete të fuqizuara nga AI agjentike në kompjuterët e tyre, brenda mureve të kompanive të tyre, duke ndërvepruar me platformat tona në një mënyrë krejtësisht agjentike”, tha ai.
Banka tashmë u ka dhënë disa klientëve akses të hershëm agjentik dhe planifikon ta hapë këtë mundësi për 3,400 klientët administrues të firmës deri vitin e ardhshëm, tha Mitchell.
Kjo është shenja më e fundit se Wall Street po përgatitet për një të ardhme ku agjentët e AI-së do të kryejnë detyra që sot bëhen nga përdorues të programeve kompjuterike.
Rivalë si JPMorgan Chase dhe Goldman Sachs po përdorin agjentë të AI-së brenda kompanive për detyra si shkrimi i kodit, por ende nuk kanë njoftuar publikisht hapa për t’u lejuar agjentëve të jashtëm të lidhen drejtpërdrejt me sistemet e tyre.
Menaxhimi i pasurisë në Morgan Stanley
Morgan Stanley e ka marrë biznesin tradicional të administrimit të planeve të kompensimit me aksione për korporatat dhe e ka kthyer në një kanal vendimtar për divizionin e saj të menaxhimit të pasurisë, që është më i madhi në botë, me 7.35 trilionë dollarë asete klientësh.
Firma bleu Solium Capital në vitin 2019 dhe E-Trade në vitin 2020, duke krijuar një biznes që, sipas saj, u shërben pothuajse gjysmës së kompanive në indeksin S&P 500 dhe tetë nga dhjetë startup-et më të mëdha “unicorn”. Ideja kryesore ishte se, duke administruar planet e aksioneve të punonjësve, Morgan Stanley mund t’i kthejë punonjësit në klientë këshillimi financiar ndërsa pasuria e tyre rritet.
Oferta e bankës për klientët korporativë në lidhje me AI-në është e drejtpërdrejtë: kompanitë teknologjike dhe bioteknologjike me rritje të shpejtë duan të administrojnë plane gjithnjë e më komplekse aksionesh, pa shtuar staf në role mbështetëse si burimet njerëzore, tha Mitchell.
Në këto kompani, agjentët e AI-së mund të kryejnë pjesë të punës pa pasur nevojë për punonjës njerëzorë shtesë, tha ai.
E njëjta logjikë vlen edhe brenda bankës: Morgan Stanley e sheh AI-në agjentike si një mënyrë për të zgjeruar shërbimet e veta, mbështetjen ndaj klientëve, administrimin e planeve dhe kanalin e menaxhimit të pasurisë, pa shtuar “mijëra e mijëra” punonjës, tha Mitchell.
Për këtë ndryshim, Morgan Stanley po mbështetet te diçka që quhet Model Context Protocol, një standard me burim të hapur që u lejon modeleve të AI-së të lidhen me burimet e të dhënave.
Në botën para AI-së, kompanitë do ta shihnin me dyshim lejimin e klientëve që të anashkalonin hyrjen kryesore online në shërbimet e tyre. Për dekada, kompanitë kanë luftuar për t’i lidhur përdoruesit me platformat e tyre pronësore.
Morgan Stanley, e cila nisi partneritetin me OpenAI në vitin 2022, beson se kjo ka më pak rëndësi në një botë ku agjentët e AI-së bëhen ndërfaqja kryesore. Programet kompjuterike janë “qartazi në një pikë kthese”, tha Mitchell.
“Kompanitë që do të mbijetojnë në të ardhmen janë ato që kanë të dhëna pronësore dhe logjikë biznesi, që është themeli i ofertës sonë”, tha Mitchell.
“Fakti që ata nuk do të hyjnë më” në faqet e internetit, tha ai, “nuk na frikëson aspak.”/Përshtati nga CNBC, ekofin.al
