Afati për dorëzimin e pasqyrave financiare për vitin fiskal 2025 po afron dhe Administrata Tatimore u ka rikujtuar të gjithë tatimpaguesve që kanë këtë detyrim ligjor se raportimi duhet të kryhet brenda datës 31 mars 2026. Pas këtij afati, subjektet që nuk kanë dorëzuar dokumentacionin përkatës rrezikojnë të përballen me masa administrative dhe penalitete sipas legjislacionit në fuqi për procedurat tatimore.
Dorëzimi i pasqyrave financiare realizohet ekskluzivisht përmes sistemit elektronik e-Filing, platforma përmes së cilës subjektet raportojnë dokumentet financiare dhe të dhënat e tjera të kërkuara nga administrata tatimore. Ky detyrim buron nga kuadri ligjor i përcaktuar në ligjin nr. 29/2023 “Për tatimin mbi të ardhurat”, udhëzimin nr. 26 të Ministrit të Financave, si dhe vendimin e Këshillit të Ministrave nr. 922/2014, i cili parashikon deklarimin e detyrueshëm të dokumenteve tatimore vetëm në formë elektronike.
Detyrimi për dorëzimin e pasqyrave financiare i përket të gjitha subjekteve që kanë përgjegjësi tatimore për tatimin mbi fitimin korporativ ose për tatimin mbi të ardhurat personale biznesore, në rastet kur qarkullimi i tyre vjetor tejkalon 5 milionë lekë. Ky rregull vlen gjithashtu edhe për organizatat jofitimprurëse, për të cilat kriteri i vetëm përcaktues është niveli i qarkullimit vjetor mbi këtë prag, pavarësisht nëse janë ose jo subjekt i tatimit mbi fitimin.
Pasqyrat financiare duhet të hartohen në përputhje me kërkesat e ligjit nr. 25/2018 “Për Kontabilitetin dhe Pasqyrat Financiare”, duke reflektuar gjendjen reale financiare të subjektit për vitin ushtrimor 2025. Sipas procedurave tatimore, bashkë me pasqyrat financiare duhet të dorëzohen edhe dokumente shtesë që lidhen me aktivitetin ekonomik të subjektit.
Ndër dokumentet e detyrueshme përfshihet gjendja analitike e inventarit të mallrave për rishitje, lëndës së parë, prodhimit në proces dhe produkteve të gatshme në datën 31 dhjetor 2025, si dhe inventari i mjeteve të transportit në pronësi të subjektit. Këto të dhëna janë pjesë e rëndësishme e raportimit financiar dhe shërbejnë për verifikimin e pasqyrimit korrekt të aktiviteteve ekonomike.
Administrata Tatimore ka sqaruar se pasqyrat financiare duhet të dorëzohen në dy formate: në version PDF të skanuar dhe në version Excel. Dokumentet në format PDF duhet të jenë të nënshkruara dhe të vulosura nga përfaqësuesi ligjor i shoqërisë, zakonisht administratori, ose nga personi përgjegjës për hartimin e tyre. Ndërkohë, raporti i ekspertit të autorizuar të shoqërisë dorëzohet vetëm në version PDF të skanuar.
Inventari i mallrave dhe kategorive të tjera për datën 31 dhjetor 2025 duhet të deklarohet në format Excel, me kusht që dokumenti i paraqitur të jetë në një format të pandryshueshëm. Përveç dorëzimit të dokumenteve, subjektet duhet gjithashtu të plotësojnë të dhënat përkatëse në seksionin “Kontabilitet” në llogarinë e tyre elektronike në sistemin e-Filing, duke zgjedhur periudhën tatimore përkatëse dhe duke plotësuar të gjitha fushat që kërkon ndërfaqja e sistemit.
Një element tjetër i rëndësishëm lidhet me identifikimin e personit që ka hartuar pasqyrat financiare. Në rastet kur ato përgatiten nga një individ i punësuar pranë subjektit, duhet të deklarohet ID personale e tij. Ndërsa kur hartuesi është kontabilist i miratuar, shoqëri auditimi apo shoqëri kontabiliteti, deklarohet numri unik i identifikimit të subjektit përkatës (NUIS).
Administrata Tatimore u bën thirrje të gjithë tatimpaguesve që të mos e lënë dorëzimin e pasqyrave financiare për momentin e fundit, në mënyrë që të shmangen vonesat apo problematikat teknike në sistemin elektronik. /ekofin.al
