Projektbuxheti për vitin e ardhshëm parashikon fonde të posaçme për rritjen e pagave dhe indeksimin pensioneve. Kështu sipas të dhënave të detajuara, fondi kontigjencë për politika pensionesh është parashikuar në rreth 2.6 miliardë lekë i cili do të përdoret për indeksim, ashtu sikurse ndodh çdo vit, duke qenë se çmimet vijnë gjithnjë dhe në rritje.
Qeveria ka parashikuar rritje të nivelit të përfitimeve të pensionistëve sipas rritjes së indeksit të çmimeve të mallrave të konsumit dhe të shërbimeve, të përcaktuar në produktet bazë të shportës. Rritja është llogaritur me indeksin mesatar 2.5 % në vit, duke filluar në periudhën 01.04 i çdo viti. Ndërkaq, është parashikuar një fond prej 3.5 miliardë lekësh për bonusin e pensionistëve, i cili do të shpërndahet si shpërblim për festat e fundvitit, në vlerën e 5 mijë lekëve.
Sipas shifrave më të fundit, numri i pensioneve është rreth 669 mijë persona, të cilët do pritet të marrin 5 mijë lekë shpërblim. Sakaq, është parashikuar një fond rezervë për rritjen e pagave në vlerën e 2.4 miliardë lekëve, që do të mbulojë një kategori të gjerë, që nga punonjësit e bluzat e bardha, arsimtarët, ushtarakët, etj. Ky fond vjetor për rritjen e pagave, parashikon rritjen e pagës për funksion me 6% për punonjësit shëndetësor dhe ata arsimorë.
