Dhoma Ekonomike e Gruas në Shqipëri (WECA) ka shprehur shqetësimin për ndryshimet e propozuara në Paketën Fiskale 2027, duke paralajmëruar se rritja e barrës tatimore dhe ulja e pragut të regjistrimit në TVSH mund të ndikojnë negativisht te ndërmarrjet mikro, të vogla dhe të mesme, veçanërisht te bizneset e drejtuara nga gratë dhe vajzat.
Në një deklaratë për mediat, WECA kërkon që politika fiskale të mbështesë zhvillimin e sipërmarrjes dhe jo të krijojë pengesa të reja për investimet, formalizimin dhe zgjerimin e aktivitetit ekonomik.
Dhoma Ekonomike e Gruas thekson se mbështet reformat që synojnë formalizimin e ekonomisë, reduktimin e burokracisë dhe krijimin e një mjedisi ekonomik të qëndrueshëm. Megjithatë, sipas saj, ndryshimet që ndikojnë drejtpërdrejt në kostot, likuiditetin dhe aftësinë investuese të bizneseve duhet të paraprihen nga konsultime reale me komunitetin e sipërmarrjes dhe nga analiza të plota të ndikimit ekonomik.
Ulja e pragut të TVSH-së, shqetësim për bizneset e vogla
Një nga shqetësimet kryesore të WECA-s lidhet me propozimin për uljen e pragut të regjistrimit të detyrueshëm në TVSH nga 10 milionë në 5 milionë lekë qarkullim vjetor.
Sipas Dhomës Ekonomike të Gruas, ky ndryshim mund të përfshijë në skemën e TVSH-së një numër më të madh biznesesh të vogla, duke u krijuar detyrime të reja për raportimin, kontabilitetin dhe administrimin fiskal.
Organizata argumenton se një pjesë e rëndësishme e grave që hyjnë në sipërmarrje e nisin aktivitetin e tyre si mikrobiznese ose biznese të vogla. Për këtë arsye, rritja e kostove administrative dhe fiskale mund të ndikojë drejtpërdrejt në mundësitë e tyre për t’u zhvilluar.
WECA kërkon rishikimin e propozimit për përgjysmimin e pragut të TVSH-së ose, si alternativë, vendosjen e një periudhe tranzitore dhe mekanizmave lehtësues për subjektet që preken nga ndryshimi.
Sipas saj, kalimi nga mikrobiznesi në një ndërmarrje më të zhvilluar dhe konkurruese nuk duhet të shoqërohet me barriera të reja administrative dhe financiare.
Rritja e tatimit mbi fitimin dhe dividendin mund të kufizojë investimet
Dhoma Ekonomike e Gruas shpreh rezerva edhe për propozimet që parashikojnë rritjen e tatimit mbi fitimin nga 15% në 17% dhe të tatimit mbi dividendin nga 8% në 15%.
Në deklaratë theksohet se për ndërmarrjet e vogla dhe të mesme, fitimi përbën shpesh burimin kryesor të financimit për zgjerimin e aktivitetit, investimet në teknologji dhe punësimin.
Për këtë arsye, sipas WECA-s, rritja e tatimit mbi fitimin dhe dividendin kërkon një vlerësim të kujdesshëm të ndikimit që mund të ketë në aftësinë e bizneseve për të riinvestuar kapitalin e krijuar.
Dhoma Ekonomike e Gruas kërkon që politikat fiskale të krijojnë stimuj për gratë sipërmarrëse që të investojnë dhe të zgjerojnë aktivitetet e tyre, duke ruajtur kapitalin e nevojshëm për zhvillim.
Kundërshtohet edhe rritja e TVSH-së nga 20% në 21%
Një tjetër pikë e deklaratës është kundërshtimi i rritjes së propozuar të normës standarde të TVSH-së nga 20% në 21%.
WECA vlerëson se kjo masë do të shtonte barrën mbi konsumatorët, duke ndikuar në fuqinë e tyre blerëse dhe duke krijuar presion shtesë mbi bizneset.
Sipas organizatës, efektet mund të ndihen veçanërisht te ndërmarrjet mikro dhe të vogla të drejtuara nga gratë dhe vajzat, të cilat kanë kapacitete më të kufizuara financiare për të përballuar ndryshimet e kostove dhe të kërkesës në treg.
Turizmi dhe agroturizmi, kërkohet kujdes me rritjen e TVSH-së
Dhoma Ekonomike e Gruas ndalet edhe te rritja e propozuar e TVSH-së në sektorin e turizmit nga 6% në 10%.
Sipas WECA-s, turizmi, agroturizmi, artizanati, prodhimi lokal dhe shërbimet janë ndër sektorët ku zhvillohen shumë iniciativa sipërmarrëse të grave dhe familjeve shqiptare.
Organizata kërkon që çdo ndryshim i barrës fiskale në këto aktivitete të analizohet në raport me konkurrueshmërinë, investimet dhe qëndrueshmërinë financiare të bizneseve.
Vëmendje e veçantë kërkohet për strukturat e vogla turistike, bizneset familjare dhe sipërmarrjet lokale, të cilat mund të kenë më pak mundësi për të përballuar rritjen e detyrimeve fiskale.
Gjashtë kërkesat e Dhomës Ekonomike të Gruas
Në reagimin e saj, WECA paraqet gjashtë kërkesa konkrete për institucionet përgjegjëse për hartimin dhe miratimin e Paketës Fiskale 2027.
Së pari, kërkon konsultim të drejtpërdrejtë me organizatat përfaqësuese të biznesit dhe sipërmarrjes së grave përpara miratimit përfundimtar të ndryshimeve.
Së dyti, kërkon realizimin e një analize të posaçme mbi ndikimin që Paketa Fiskale 2027 do të ketë te gratë sipërmarrëse dhe bizneset e drejtuara prej tyre.
Kërkesa e tretë lidhet me rishikimin e uljes së pragut të TVSH-së nga 10 në 5 milionë lekë, ose vendosjen e një periudhe tranzitore dhe mekanizmave lehtësues për bizneset mikro dhe të vogla.
Së katërti, WECA kërkon vlerësimin e ndikimit të rritjes së tatimit mbi fitimin dhe dividendin në aftësinë e ndërmarrjeve të vogla dhe të mesme për të riinvestuar dhe për t’u zgjeruar.
Kërkesa e pestë ka të bëjë me analizimin e pasojave të rritjes së TVSH-së në turizëm dhe agroturizëm, veçanërisht për strukturat e vogla, familjare dhe sipërmarrjet lokale.
Së fundi, organizata propozon masa fiskale që nxisin formalizimin, investimin dhe rritjen e bizneseve të drejtuara nga gratë, duke shmangur krijimin e pengesave të reja për sipërmarrjet në fazat e para të zhvillimit.
WECA: Zëri i grave sipërmarrëse duhet të jetë pjesë e vendimmarrjes
Në përfundim të deklaratës, Dhoma Ekonomike e Gruas thekson se politikat fiskale nuk janë thjesht çështje normash tatimore dhe përqindjesh, por ndikojnë drejtpërdrejt në vendimmarrjen ekonomike të grave.
Sipas organizatës, këto politika ndikojnë në vendimin e një gruaje për të hapur një biznes, për të punësuar, për të investuar, për të formalizuar aktivitetin apo për ta zgjeruar atë.
“Shqipëria ka nevojë për më shumë gra dhe vajza që ndërmarrin iniciativa ekonomike, krijojnë biznese dhe vende pune. Politika fiskale duhet ta mbështesë këtë proces dhe jo ta bëjë rrugën drejt sipërmarrjes më të vështirë”, theksohet në deklaratën e WECA-s. /ekofin.al
