Portugalia u votua si “Destinacioni më i Mirë në Evropë” në ceremoninë e këtij viti të World Travel Awards. Vendi rimori nderin që e kishte humbur vitin e kaluar ndaj Greqisë, dhe që e ka fituar gjashtë herë që nga viti 2017.
Këtë vit, Portugalia u dallua nga një listë me 12 territore evropiane të nominuara: Austria, Franca, Gjermania, Greqia, Irlanda, Italia, Norvegjia, Spanja, Suedia, Zvicra dhe Turqia.
Pedro Machado, Sekretar i Shtetit për Turizmin, Tregtinë dhe Shërbimet, tha se ky vlerësim “pasqyron punën, përkushtimin dhe cilësinë e të gjithë profesionistëve që, çdo ditë, e bëjnë turizmin një nga shtyllat kryesore të ekonomisë sonë”, sipas një njoftimi të publikuar në faqen e Turismo de Portugal.
Në të njëjtën deklaratë, presidenti i Turismo de Portugal, Carlos Abade, shtoi se “ky çmim demonstron aftësinë e madhe të Portugalisë për t’u afirmuar si një nga destinacionet më të mira turistike në Evropë”, duke theksuar se ai “përfaqëson konsolidimin e një pozicioni të spikatur që vendi e ka ndërtuar në mënyrë të qëndrueshme”.
Kjo ishte edita e 32-të e World Travel Awards, me ceremoninë e ndarjes së çmimeve që u zhvillua të mërkurën në Sardenjë, Itali.
Madeira, Lisbona dhe Porto në qendër të vëmendjes
Disa rajone kombëtare u vlerësuan gjithashtu në World Travel Awards 2025. Madeira fitoi titullin “Destinacioni më i Mirë Ishullor në Evropë”, Porto u shpall destinacioni më i mirë urban në kontinent, ndërsa Lisbona u zgjodh si qyteti më i rekomanduar për pushime të shkurtra.
Në Evropën Jugore, Huesca La Magia në Spanjë fitoi në kategorinë e destinacionit më të mirë për turizëm aventurash, duke “rrëzuar” Azoret, që kishin fituar këtë çmim vitin e kaluar. Costa Navarino në Greqi u nominua si vendi më i përshtatshëm për pushime bregdetare në kontinent.
Qyteti bregdetar Batumi, një nga “perlët” e Gjeorgjisë, u konsiderua vendi më i mirë për t’u vizituar “në të gjitha stinët” e vitit. Në Kroaci, Dubrovniku u shpall sërish “destinacioni kryesor i kroçerave”, si në dy edicionet e mëparshme.
Ndërkohë, Franca fitoi çmimin për “Destinacionin më të Mirë Kulturor në Evropë” për vitin 2025, ndërsa Athina, kryeqyteti grek, u vlerësua si qyteti më i mirë në këtë kategori.
Titulli i “Destinacionit më premtues turistik në zhvillim” në kontinent iu dha rajonit Maqedonia Lindore dhe Thrakë në Greqi./Përshtati nga Euronews, ekofin.al
