Inflacioni në Eurozonë ra në 1.9% në muajin maj, nën parashikimet e analistëve, duke shtuar gjasat që Banka Qendrore Evropiane (BQE) të ulë normën bazë të interesit në takimin e së enjtes. Rënia e inflacionit nën objektivin zyrtar prej 2% ndodhi për herë të parë që nga shtatori 2024, sipas vlerësimit paraprak të Eurostat.
Inflacioni bazë gjithashtu në rënie
Edhe inflacioni bazë, i cili përjashton çmimet e ushqimeve dhe energjisë, tregoi shenja ftohjeje duke zbritur në 2.4% nga 2.7% në prill, përkundër pritshmërive për një vlerë prej 2.5%. Në bazë mujore, çmimet bazë u rritën me vetëm 0.1%.
Ulje çmimesh në sektorë kyç
Rënia e inflacionit është nxitur nga dobësimi i kërkesës së konsumatorëve dhe pasiguria globale tregtare që po ndikon fuqinë e çmimeve në shumë sektorë. Kategoritë që kontribuan në inflacion ishin: ushqime, alkool dhe duhan: +3.3% vjetore (nga 3.0% në prill), shërbime: nga +4.0% në prill në 3.2%; mallra industriale jo-energjetike: +0.6% (e pandryshuar); energjia: -3.6% (rënie vjetore e vazhdueshme)
Në total, inflacioni mujor ishte zero (0.0%) në maj, pas një rritjeje 0.6% në prill, duke sinjalizuar një ftohje të qartë të ritmit të çmimeve.
Divergjenca mes vendeve të eurozonës
Inflacioni më i lartë vjetor: Estoni (4.6%), Sllovaki dhe Kroaci (4.3%), Inflacioni më i ulët: Francë (0.6%). Inflacioni mujor më i lartë: Portugali (+0.7%) dhe Kroaci (+0.6%) Deflacion mujor: Belgjikë, Spanjë, Francë, Lituani, Holandë, Austri dhe Slloveni
Papunësia bie në nivele të reja
Në një publikim të ndarë, Eurostat raportoi se norma e papunësisë në eurozonë ra në 6.2% në maj, nga 6.3% në mars dhe 6.4% një vit më parë.
Tregjet presin ulje me 25 pikë bazë nga BQE
Pas publikimit të të dhënave të inflacionit, euro ra në $1.1400 përballë dollarit amerikan, ndërsa tregjet çmuan plotësisht një ulje prej 25 pikësh bazë në normën e depozitave të BQE-së këtë të enjte – duke e zbritur në 2.0%, nivelin më të ulët që prej janarit 2023.
Obligacionet sovrane të Eurozonës u tregtuan të qëndrueshme, ndërsa yield-i i obligacionit 2-vjeçar gjerman zbriti në 1.77%.
Indekset dhe aksionet në rënie
Indeksi Euro STOXX 50 ra me 0.8% të martën në mëngjes, pas paralajmërimit të OECD për ngadalësim të rritjes globale për shkak të tensioneve tregtare. Mes kompanive që humbën më shumë ishin: Orange: -3%, Société Générale: -1.9%, LVMH: -1.6%
Ndërsa Deutsche Telekom ishte përformuesi më i mirë me një rritje prej 2%./Përshtati nga Euronews, ekofin.al
