Përdoruesit ditorë në SHBA të platformës globale të tregtisë elektronike me zbritje Temu, në pronësi të PDD Holdings ranë me 58% gjatë majit, sipas firmës së inteligjencës së tregut Sensor Tower – një nga shumë sfidat me të cilat përballet ky shitës online në mes të luftës tregtare SHBA-Kinë.
Temu vendosi të shkurtojë shpenzimet për reklama në SHBA dhe të ndryshojë strategjinë e përmbushjes së porosive pas vendimit të Shtëpisë së Bardhë më 2 maj për t’i dhënë fund praktikës së njohur si “de minimis” – e cila u lejonte kompanive kineze të dërgonin paketa me vlerë të ulët në SHBA pa tarifa doganore.
Temu, së bashku me gjigantin e modës së shpejtë Shein, kishte shfrytëzuar këtë përjashtim për vite me radhë për të dërguar drejtpërdrejt produkte nga furnizuesit në Kinë te konsumatorët në SHBA, duke mbajtur çmimet të ulëta.
Të dy platformat, Temu dhe Shein, kanë përjetuar një rënie të fortë të ritmit të rritjes së shitjeve dhe të numrit të klientëve që nga koha kur Presidenti i SHBA-së Donald Trump njoftoi tarifa të gjera tregtare, sipas të dhënave të mbledhura nga firma këshilluese Bain & Company, por trendet e Temu janë përkeqësuar më shumë se ato të Shein.
Tarifat i kanë detyruar të dy platformat të rrisin çmimet, por Shein ka arritur të rrisë shpenzimin mesatar për klient në krahasim me një vit më parë, ndërsa Temu ka hasur vështirësi, tregojnë të dhënat.
Temu nuk ka dhënë koment mbi rënien e përdoruesve ditorë në SHBA apo mbi sfidat që po përballet në tregun amerikan.
Angazhimi në platformën Temu ka rënë ndjeshëm pas përfundimit të përjashtimit nga tarifat, tha analisti i Morgan Stanley, Simeon Gutman, në një shënim të muajit maj.
“Ndonëse mjedisi i tarifave është i paqartë, nëse status quo-ja zgjat për një periudhë të gjatë, besojmë se kërcënimi konkurrues i Temu do të dobësohet më tej,” shtoi Gutman.
Javën e kaluar, fitimet për tremujorin e parë të PDD ishin më të ulëta se parashikimet për rritje, dhe drejtuesit e kompanisë thanë gjatë një telefonate me analistët se tarifat po ushtrojnë presion të ndjeshëm mbi tregtarët e saj.
Ata përsëritën zotimin e mëparshëm të Temu për të mbajtur çmimet të qëndrueshme dhe për të punuar me tregtarë në rajone të ndryshme, duke iu referuar kalimit në një model lokal të përmbushjes së porosive të shpallur në fillim të majit.
Modeli i mëparshëm i biznesit të Temu u linte tregtarëve përgjegjësinë për porositjen dhe furnizimin e produkteve, ndërsa kompania me bazë në Kinë menaxhonte pjesën më të madhe të logjistikës, çmimeve dhe marketingut.
Tani, sipas një shënimi të analistëve të HSBC, tregtarët e Temu “mund të dërgojnë porositë individuale nga Kina në magazinat e partnerëve të Temu në SHBA, por do të duhet të merren vetë me tarifat, taksat doganore dhe dokumentacionin përkatës”. Temu vazhdon të merret me përmbushjen e porosive pranë konsumatorëve, vendosjen e çmimeve dhe funksionimin e platformës online.
Në shënimin e javës së kaluar, HSBC tha se rritja e Temu në tregjet jashtë SHBA-së është përshpejtuar, me përdoruesit jashtë SHBA që përbënin 90% të 405 milionë përdoruesve aktivë mujorë në mbarë botën gjatë tremujorit të dytë.
“Përdoruesit e rinj po rriten më shpejt në tregjet më pak të pasura,” shkruajnë analistët./Përshtati nga Reuters, ekofin.al
