Me afrimin e fundit të shtatorit dhe zbehjen graduale të efektit sezonal të turizmit, euro ka shënuar këtë fundjavë një nga rritjet më të forta ditore të periudhës së fundit ndaj lekut, duke iu afruar sërish nivelit të 92 lekëve.
Sipas kursit zyrtar të këmbimit të Bankës së Shqipërisë, të publikuar më 25 shtator, një euro këmbehet me 91.97 lekë, duke u rritur me 0.47 lekë brenda një dite. Ky është një ndryshim relativisht i fortë për tregun vendas të këmbimit, ku gjatë muajve të verës euro ishte vendosur në nivele dukshëm më të ulëta.
Lëvizja vjen në një moment kur sezoni i pikut turistik po mbyllet. Gjatë verës, hyrjet e larta të valutës nga turistët e huaj rrisin ofertën e euros në treg dhe ushtrojnë presion në drejtim të forcimit të lekut. Me përfundimin gradual të sezonit, ky efekt fillon të dobësohet, duke krijuar më shumë hapësirë për rikuperimin e monedhës europiane.
Vetëm gjatë ditës së fundit, rritja prej 0.47 lekësh përfaqëson një vlerësim prej rreth 0.5% të euros ndaj lekut. Megjithatë, mbetet për t’u parë nëse afrimi me kufirin e 92 lekëve do të shndërrohet në një prirje më të qëndrueshme gjatë javëve të ardhshme apo do të rezultojë një lëvizje afatshkurtër e tregut.
Forcimi gjatë ditës nuk është kufizuar vetëm te euro. Dollari amerikan është rritur me 0.30 lekë, në 80.74 lekë, ndërsa paundi britanik është ngjitur me 0.45 lekë, në 106.84 lekë. Franga zvicerane është kuotuar në 97.39 lekë, me një rritje prej 0.23 lekësh.
Ecuria e euros gjatë vjeshtës do të jetë me interes të veçantë pas forcimit të ndjeshëm të lekut gjatë sezonit veror. Përveç flukseve nga turizmi, kursi ndikohet edhe nga hyrjet e tjera valutore, investimet e huaja, remitancat, kërkesa e bizneseve për valutë dhe lëvizjet në tregjet ndërkombëtare./ekofin.al

