Makina e parë plotësisht elektrike e Bentley-t vë në provë gatishmërinë e klientëve të pasur për të kaluar te automjetet elektrike luksoze dhe shoqërohet me një investim prej 408 milionë eurosh në fabrikën e kompanisë në Crewe. Prezantimi mbështet vendet ekzistuese të punës, në një kohë kur disa rivalë të segmentit luksoz kanë shtyrë ose braktisur planet për modele elektrike.
Pas më shumë se 100 vitesh histori, prodhuesi britanik i makinave luksoze Bentley ka prezantuar atë që e cilëson si “një nga modelet e reja më të rëndësishme në historinë e gjatë të kompanisë”: makinën e tij të parë plotësisht elektrike.
Torcal është linja e katërt e modeleve të Bentley-t dhe prova e parë për të parë se sa të gatshëm janë klientët e pasur të blejnë një Bentley plotësisht elektrik. Sfida është e rëndësishme për kompaninë në pronësi të Volkswagen: Bentley dorëzoi 4,200 automjete në gjysmën e parë të vitit 2026, 13.6% më pak se një vit më parë.
Bentley ka përfunduar gjithashtu një investim prej 350 milionë paundësh, ose rreth 408 milionë euro, në fabrikën e saj në Crewe. Investimi përfshin një sërë përmirësimesh, ndër to edhe një linjë të re prodhimi për Torcal. Sekretari britanik për Biznesin, Jonathan Reynolds, deklaroi se investimi do të mbështesë 4,000 vende ekzistuese pune në fabrikë.
Shitjet e makinave elektrike po rriten në të gjithë Bashkimin Europian, por prodhuesit e automjeteve luksoze nuk bien dakord se sa shpejt klientët e tyre do të kalojnë te teknologjia elektrike. Porsche ka shtyrë disa modele elektrike, Lamborghini ka hequr dorë nga planet për një version elektrik të Lanzador, ndërsa McLaren thotë se klientët e saj ende nuk po kërkojnë makina elektrike.
Ferrari prezantoi në maj makinën e tij të parë elektrike, Luce. Dizajni i saj u kritikua, por drejtori ekzekutiv i Ferrari-t deklaroi në korrik se porositë po ecnin në përputhje me pritshmëritë, përfshirë edhe interesin nga klientë të rinj.
Bentley po bën një bast të ndryshëm: se një SUV me pamje të njohur, i pozicionuar në pjesën më të përballueshme të gamës së tij, mund të tërheqë si blerës më të rinj, ashtu edhe klientët ekzistues.
Sipas raportimeve, Torcal do të ketë një çmim fillestar prej 173,300 paundësh, ose rreth 202,000 euro, në Mbretërinë e Bashkuar.
Ky çmim është më i ulët se çmimet fillestare të tri linjave të tjera të Bentley-t: Bentayga nis nga 181,365 paund, rreth 211,000 euro; Flying Spur nga 207,120 paund, rreth 241,000 euro; ndërsa Continental GT nga 239,320 paund, ose rreth 279,000 euro.
Bentley thotë se SUV-i mund të përshkojë deri në 600 kilometra me një karikim të vetëm. Versioni më i fuqishëm Torcal S mund të përshpejtojë nga 0 në 100 km/h për 2.9 sekonda.
Kompania ka krijuar gjithashtu një tingull të frymëzuar nga motori i saj tradicional V8, me synimin për të ruajtur një pjesë të ndjesisë karakteristike të drejtimit të një Bentley.
“Torcal-i krejtësisht i ri, në çdo aspekt të dizajnit, teknologjisë, mjeshtërisë, materialeve dhe qëndrueshmërisë së tij, është modeli mbi të cilin do të bazohen Bentley-t e së ardhmes, pavarësisht llojit të sistemit të fuqisë”, tha kompania në një deklaratë.
Prezantimi vjen pasi Bentley e shtyu objektivin fillestar për t’u bërë plotësisht elektrike nga viti 2030 në vitin 2035. Më pas kompania deklaroi se edhe objektivi i vitit 2035 mund të shtyhet më tej./Përshtati nga Euronews, ekofin.al
