Aeroporti Ndërkombëtar i Tiranës ka vijuar me ritme të larta rritjen e trafikut të pasagjerëve edhe gjatë muajit gusht, duke e çuar në mbi 9.37 milionë numrin e udhëtarëve që kanë kaluar përmes aeroportit gjatë tetë muajve të parë të vitit 2026.
Sipas të dhënave të siguruara nga ekofin.al, gjatë gushtit 2026 aeroporti ka përpunuar 1,705,825 pasagjerë, kundrejt 1,413,064 pasagjerëve në gusht 2025. Kjo përkthehet në një rritje vjetore prej 20.7%, ose rreth 292,800 pasagjerë më shumë brenda një muaji.
Gushti ka tejkaluar gjithashtu korrikun e këtij viti. Në korrik 2026, Tirana International Airport regjistroi 1,646,841 pasagjerë, ndërsa në gusht numri u rrit me rreth 59 mijë.
Kjo do të thotë se vetëm gjatë korrikut dhe gushtit, dy muajt kryesorë të sezonit turistik, aeroporti ka përpunuar rreth 3.35 milionë pasagjerë, një tjetër rekord.
Rritja e trafikut është reflektuar paralelisht edhe te numri i fluturimeve. Në gusht 2026 janë regjistruar 9,692 lëvizje avionësh, nga 8,106 në gushtin e vitit 2025. Diferenca është 1,586 fluturime më shumë, ose një rritje prej rreth 19.6% në terma vjetorë.
Edhe në këtë tregues gushti ka rezultuar lehtësisht mbi korrikun. Gjatë korrikut u regjistruan 9,574 lëvizje avionësh, ndërsa në gusht numri arriti në 9,692.
Të dhënat tregojnë kështu se ritmi i rritjes gjatë gushtit ka qenë dukshëm më i lartë se rritja kumulative e regjistruar deri në korrik, si për trafikun e pasagjerëve, ashtu edhe për lëvizjet e avionëve. Vetëm gjatë muajit gusht, numri i pasagjerëve u rrit me 20.7%, ndërsa numri i fluturimeve me 19.6% krahasuar me gushtin e një viti më parë.
Rritja e fortë e trafikut në Aeroportin Ndërkombëtar të Tiranës është shoqëruar vitet e fundit edhe me një cikël të gjerë investimesh për zgjerimin dhe modernizimin e infrastrukturës. Që prej marrjes së menaxhimit nga Kastrati Group në dhjetor 2019, sipas TIA-s, janë investuar mbi 100 milionë euro në infrastrukturë dhe operacione, prej të cilave rreth 5 milionë euro në projekte të qëndrueshmërisë. Investimet kanë përfshirë zgjerimin e terminalit, rritjen e kapaciteteve operacionale, sistemet moderne të check-in-it dhe sigurisë, e-gates dhe teknologji të reja aeroportuale.
Vetëm gjatë viteve të para të programit të investimeve, sipërfaqja e terminalit u trefishua, ndërsa projekti parashikon që ajo të arrijë rreth 100 mijë metra katrorë. Zgjerimi ka përfshirë gjithashtu 15 mijë metra katrorë në zonën e mbërritjeve dhe shtimin e gjashtë pozicioneve të reja të parkimit të avionëve, duke e çuar numrin e tyre në 29.
Paralelisht me investimet fizike, aeroporti po modernizon edhe menaxhimin operacional. Në maj 2026, TIA njoftoi përzgjedhjen e një sistemi të ri të integruar të menaxhimit aeroportual, që synon automatizimin dhe koordinimin e proceseve kryesore të operimit në kushtet e rritjes së vazhdueshme të trafikut.
Kjo rritje e kapaciteteve dhe zgjerimi i rrjetit të destinacioneve e kanë forcuar pozicionin e Tiranës si një hub rajonal i aviacionit dhe aeroporti kryesor i Ballkanit Perëndimor. TIA është tashmë një qendër rajonale e konsoliduar, duke arritur 11.6 milionë pasagjerë në vitin 2025, ose 249% më shumë se në vitin 2019.
Edhe të dhënat e ACI EUROPE tregojnë për ritmin e jashtëzakonshëm të zhvillimit të tregut shqiptar të aviacionit. Në vitin 2025, trafiku i pasagjerëve në aeroportet e Shqipërisë u rrit me 8.7%, ndërkohë që mesatarja e gjithë rrjetit aeroportual europian ishte vetëm 4.4%. Në një horizont më të gjatë, Tirana ka spikatur veçanërisht për zgjerimin e lidhjeve direkte: ACI EUROPE raportonte më herët një rritje prej 186% të lidhshmërisë direkte krahasuar me vitin 2019, duke e vendosur Tiranën mes aeroporteve europiane me transformimin më të shpejtë të rrjetit të destinacioneve.
Me mbi 9.37 milionë pasagjerë në tetë muajt e parë të 2026-s, ritmi aktual tregon se Aeroporti i Tiranës po hyn në një tjetër fazë të rritjes së tij, ndërsa investimet në kapacitete, teknologji dhe infrastrukturë synojnë t’i përgjigjen një trafiku që tashmë e ka ndryshuar ndjeshëm peshën e Tiranës në hartën rajonale dhe evropiane të aviacionit. /ekofin.al
