Qytetarët që kanë ndërtime pa leje me funksion banimi do të përjashtohen nga pagesa e tarifës së shërbimit të legalizimit. Këshilli i Ministrave ka miratuar sot një ndryshim në rregullat për evidentimin dhe trajtimin e ndërtimeve pa leje, duke hequr këtë kosto për subjektet poseduese të banesave.
Ndryshimi është bërë përmes një shtese në vendimin nr.1178, datë 24 dhjetor 2020, “Për përcaktimin e dokumentacionit dhe rregullave të hollësishme të evidentimit të ndërtimeve pa leje”, i cili përcakton procedurat që ndiqen nga Agjencia Shtetërore e Kadastrës.
Formulimi i ri është i drejtpërdrejtë: “Përjashtimisht, në rastet e ndërtimeve pa leje me funksion banimi, subjekti posedues përjashtohet nga pagesa e tarifës së shërbimit të legalizimit”.
Kjo do të thotë se përfitimi lidhet posaçërisht me ndërtimet pa leje që kanë funksion banimi. Vendimi nuk parashikon një heqje të përgjithshme të tarifës për çdo kategori ndërtimi pa leje, por krijon një përjashtim për banesat.
Masa prek qytetarët që janë në procesin e legalizimit të banesave të tyre, duke hequr tarifën administrative të shërbimit që shoqëron procedurën. Për zbatimin e ndryshimit ngarkohet Agjencia Shtetërore e Kadastrës. /ekofin.al
