Inteligjenca artificiale mund të përdoret për të nisur sulme kibernetike ndaj disa prej infrastrukturave tona më të rëndësishme dhe kritike, paralajmërojnë kompanitë që po zhvillojnë vetë mjetet që mund të përdoren në sulme të tilla.
Më shumë se 100 nga kompanitë më të mëdha në botë kanë ngritur alarmin për një kërcënim të afërt që lidhet me inteligjencën artificiale.
OpenAI, Anthropic, Microsoft, Alphabet – kompania mëmë e Google – Amazon dhe shumë kompani të tjera paralajmëruan se po afrohet një valë sulmesh kibernetike të fuqizuara nga inteligjenca artificiale dhe se bota nuk është e përgatitur për t’u përballur me to.
Këto sulme rrezikojnë “kompanitë dhe shërbimet publike nga të cilat varen komunitetet tona – nga spitalet dhe impiantet e trajtimit të ujit, deri te infrastruktura që mban në funksion internetin”, thuhet në letrën e hapur të nënshkruar nga më shumë se 100 kompani.
Letra është nënshkruar nga shumë prej kompanive që po zhvillojnë pikërisht teknologjinë e inteligjencës artificiale që tashmë është përdorur në sulme të tilla. Mes tyre është edhe krijuesi i ChatGPT, OpenAI, i cili e ka nënshkruar dhe publikuar letrën, ndërkohë që aktualisht po përballet me kritika të vazhdueshme lidhur me një incident ku një prej sistemeve të tij eksperimentale kreu një sulm kibernetik ndaj një kompanie tjetër të inteligjencës artificiale.
Në letër thuhet se këto lloj mjetesh të sigurisë kibernetike “po u japin tashmë mbrojtësve mënyra të reja për të korrigjuar dobësi që janë grumbulluar prej vitesh”.
Por, sipas kompanive, nevojitet veprim i vendosur që tani për të garantuar që këto mjete të përdoren për të siguruar sistemet dhe jo për t’i sulmuar ato./Përshtati nga The Independent, ekofin.al
