Zjarrfikësit po bëhen gjithnjë e më të rëndësishëm, ndërsa zjarret në pyje po prekin një numër në rritje vendesh në Europë. Kapacitetet zjarrfikëse ndryshojnë ndjeshëm nga një vend i BE-së në tjetrin.
Zjarret në pyje kanë goditur rëndë disa vende europiane këtë vit. Që në fillim të gushtit, 2026-a ishte bërë tashmë viti më i keq për sipërfaqen e djegur në disa vende.
Bashkimi Europian synon të forcojë kapacitetet për t’iu përgjigjur sezoneve gjithnjë e më të rënda të zjarreve. Zjarrfikësit profesionistë janë në qendër të kësaj përgjigjeje, krahas avionëve dhe helikopterëve zjarrfikës.
Por cilat vende europiane kanë numrin më të madh të zjarrfikësve profesionistë dhe ku ata zënë peshën më të lartë në punësim?
Sipas Eurostat, në BE kishte 372,400 zjarrfikës profesionistë në vitin 2025, ose 0.18% të punësimit total në Bashkimin Europian.
Kjo është shifra totale e zjarrfikësve. Të dhënat nuk tregojnë se sa prej tyre janë të specializuar posaçërisht për luftimin e zjarreve në pyje.

Sipas përkufizimit të Eurostat, zjarrfikësit “parandalojnë, luftojnë dhe shuajnë zjarret, ndihmojnë në raste të tjera emergjencash, mbrojnë jetën dhe pronën dhe kryejnë operacione shpëtimi”. Zjarrfikësit e pyjeve përfshihen në këtë kategori, ndërsa zjarrfikësit vullnetarë jo.
Në përgjithësi, vendet me popullsi dhe ekonomi më të mëdha kanë edhe më shumë zjarrfikës profesionistë.
Në vitin 2025, Gjermania kishte numrin më të madh, me 57,700 zjarrfikës profesionistë. Franca renditej e dyta me 47,700, ndërsa Italia e treta me 43,500.
Polonia ishte e katërta me 40,000 zjarrfikës profesionistë, ndërsa Spanja ndiqte nga afër me 38,500.
Në katër ekonomitë më të mëdha të BE-së — Gjermani, Francë, Itali dhe Spanjë — kishte rreth 187,400 zjarrfikës profesionistë. Së bashku, ato përbënin 50.3% të totalit të BE-së.
Edhe Rumania dhe Greqia kishin mbi 20 mijë zjarrfikës profesionistë, ndërsa Portugalia dhe Çekia secila më shumë se 16 mijë.
Qipro dhe Estonia kishin numrin më të ulët, me më pak se 2 mijë zjarrfikës profesionistë secila.
Megjithatë, të dhënat e Eurostat nuk mbulojnë pesë vende të BE-së.
Greqia dhe Kroacia kanë peshën më të lartë të zjarrfikësve në punësim
Nëse numri i zjarrfikësve krahasohet me punësimin total, Greqia me 0.47% dhe Kroacia me 0.43% dalin me përqindjet më të larta. Në të dyja vendet, pesha është mbi 0.4%.
Portugalia renditet më pas me 0.33%, ndërsa mesatarja e BE-së është vetëm 0.18%.
Katër ekonomitë më të mëdha të BE-së janë të gjitha në ose nën mesataren europiane: Italia me 0.18%, Spanja me 0.17%, Franca me 0.16% dhe Gjermania me 0.14%.
Megjithatë, numri i zjarrfikësve në nivel kombëtar tregon vetëm një pjesë të situatës. Gjatë sezoneve të rënda të zjarreve, vendet mund të kërkojnë personel dhe pajisje nga vende të tjera europiane, kur kapacitetet e tyre nuk mjaftojnë.
BE koordinon mbështetjen ndërkufitare
“Asnjë vend nuk duhet të përballet i vetëm me zjarret në pyje. Përmes Mekanizmit tonë të Mbrojtjes Civile, Europa po dërgon me shpejtësi avionë, helikopterë dhe zjarrfikës atje ku nevojiten më shumë”, deklaroi më 17 gusht Komisionerja e BE-së për Gatishmërinë dhe Menaxhimin e Krizave, Hadja Lahbib.
Mekanizmi i Mbrojtjes Civile i Bashkimit Europian synon të përmirësojë koordinimin në reagimin ndaj zjarreve në pyje.
Sipas Komisionit Europian, kur burimet kombëtare vihen nën presion, vendet mund të kenë akses të shpejtë në një rezervë më të gjerë zjarrfikësish, avionësh dhe kapacitetesh të tjera emergjente përmes këtij mekanizmi.
Flota zjarrfikëse e BE-së ka 22 avionë dhe pesë helikopterë
Flota rescEU dhe kapacitetet europiane të mbrojtjes civile për vitin 2026 përfshijnë 22 avionë zjarrfikës dhe 5 helikopterë.
Komisioni Europian thekson se rreziku nga zjarret pritet të rritet më tej për shkak të ndryshimeve klimatike.
Rreziku nga zjarret në pyje është shtrirë gjithashtu në zona që më parë nuk konsideroheshin të ekspozuara. Ai nuk kufizohet më vetëm në rajonin e Mesdheut, por prek edhe vende si Çekia, Gjermania dhe Suedia.
Në javën e 31-të të vitit, 2026-a renditej si viti i katërt më i keq në BE për sipërfaqen kumulative të djegur nga zjarret që prej vitit 2012, sipas Our World in Data.
Deri në fillim të gushtit, në BE ishin djegur 489,826 hektarë. Kjo ishte 13% më shumë se mesatarja për të njëjtën periudhë gjatë 14 viteve nga 2012 deri në 2025.
Qeveritë e BE-së shpenzuan 43.8 miliardë euro për mbrojtjen nga zjarret në 2024
Vendet e BE-së shpenzojnë shuma të konsiderueshme për shërbimet e mbrojtjes nga zjarret.
Në vitin 2024, shpenzimet e qeverive të BE-së për këto shërbime arritën në 43.8 miliardë euro, ose 0.5% të totalit të shpenzimeve të përgjithshme qeveritare.
Gjermania kishte nivelin më të lartë të shpenzimeve, me 13.7 miliardë euro, e ndjekur nga Franca me 7.9 miliardë euro.
Greqia shpenzoi pak më shumë se 1 miliard euro për shërbimet e mbrojtjes nga zjarret në vitin 2024.
Kjo përbënte 0.9% të shpenzimeve të qeverisë greke, përqindja më e lartë në BE, ose pothuajse 1 euro për çdo 100 euro të shpenzuara nga shteti.

Europa përballet me temperatura dhe rrezik zjarresh në rritje
Europa është kontinenti që po ngrohet më shpejt në botë.
Sipas Copernicus, qershori 2026 ishte qershori më i nxehtë i regjistruar ndonjëherë në Europën Perëndimore dhe i dyti më i ngrohtë në nivel global.
Tri vitet e fundit kanë qenë gjithashtu, përkatësisht, tre vitet më të ngrohta të regjistruara ndonjëherë në nivel global: 2024, 2023 dhe 2025./Përshtati nga Euronews, ekofin.al
