Durana Tech Park në Xhafzotaj (Durrës), i pari park teknologjik në Shqipëri, synon të tërheqë bizneset vendase dhe ato të huaja, duke u kthyer në një qendër të rëndësishme inovacioni.
Tech Parku u prezantua në një konferencë për mediat me praninë e ministrit të Ekonomisë, Kulturës dhe Inovacionit, Blendi Gonxhja dhe Drejtoreshës së Korporatës Shqiptare të Investimeve, Elira Kokona.
Ndër lehtësitë fiskale, të Durana Tech Park janë tatimi mbi fitimin 0% për 15 vitet e para, përjashtimin nga tatimi mbi pagat e punonjësve për 10 vjet për të gjithë personelin e angazhuar në kërkim dhe zhvillim, përfshirë edhe zhvilluesit, përjashtim nga TVSH-ja për mallrat, pajisjet dhe shërbimet e përdorura në park për prodhimin e produkteve inovative.
Po ashtu, përjashtim nga tatimi mbi ndikimin në infrastrukturë, nga tatimi mbi pronat për 10 vjet, për ndërtimet e ngritura brenda parkut, si dhe rimbursim pjesor shtetëror për kostot e trajnimit të personelit shkencor dhe teknik, sipas kritereve dhe procedurave të aprovuar nga qeveria.
Gonxhja theksoi se ky projekt pritet të sjellë investime të huaja, vlerë të shtuar dhe transferim të dijeve, duke ndihmuar startup-et të kthehen në biznese të qëndrueshme. Po ashtu theksoi ai, synohet krijimi i mundësive të reja për punësim dhe aftësim profesional dhe kthimi i autostradës Tiranë-Durrës në një pol rajonal të zhvillimit teknologjik.
Kokona informoi se deri tani kanë shprehur interes për të qenë pjesë e Duranës mbi 50 kompani.
“Ky park do të ofrojë mundësinë e biznesit me lehtësi të shumta fiskale”, tha ajo. Së bashku me TEDA Tirana (Prush), e cila shumë shpejt do të mirëpresë investitorët e parë, “Durana” vjen si zona tjetër e re speciale ekonomike me synim tërheqjen e investitorëve vendas dhe të huaj.
