Ndërsa shumica e udhëtarëve fokusohen te biletat e avionit dhe akomodimi, një raport i ri tregon se parkimi në aeroporte mund të jetë një kosto e papritur për evropianët gjatë pushimeve.
Megjithëse sezoni i Pashkëve nisi me probleme për shkak të grevave në aeroporte dhe rritjes së çmimeve të fluturimeve si pasojë e luftës në Iran, shumë evropianë pritet të udhëtojnë gjithsesi.
Kompani ajrore si easyJet kanë njoftuar se ky do të jetë sezoni më i ngarkuar i Pashkëve ndonjëherë, me afro 30 mijë fluturime në të gjithë Evropën.
Vitin e kaluar, rritja më e madhe e trafikut ajror në BE u regjistrua mes marsit dhe prillit, me një rritje prej 18.9%, sipas të dhënave të Eurostat.
Megjithatë, ndërsa kostot e fluturimeve dhe akomodimit zakonisht përfshihen në buxhetin e pushimeve, shpesh anashkalohet kostoja e parkimit në aeroport.
Mbretëria e Bashkuar dhe Holanda rezultojnë vendet me parkimet më të shtrenjta në 30 aeroportet më të ngarkuara të Evropës, sipas një studimi të platformës VignetteSwitzerland.com.
Aeroporti London Stansted rezulton më i shtrenjti në Evropë për parkim 24-orësh, me rreth 66 euro (£57.99).
Megjithatë, jo të gjitha aeroportet në të njëjtin qytet kanë të njëjtat tarifa.
Për shembull, një udhëtar që parkon në Stansted paguan pothuajse dyfish krahasuar me aeroportin London Heathrow — aeroporti më i ngarkuar në Evropë.
Aeroporti i Mançesterit renditet i dyti më i shtrenjtë me rreth 58 euro në ditë, i ndjekur nga Amsterdam Schiphol me 55 euro.
Diferencat në çmime janë të ndjeshme në gjithë Evropën.
Tarifa 24-orëshe në Stansted është gati 50% më e lartë se në aeroportin e Kopenhagës, rreth 35.75 euro, dhe dukshëm më e lartë se në Oslo Gardermoen, rreth 34.88 euro.
Pritjet për nisje mund të zgjasin më shumë se pritej
Diferencat nuk kufizohen vetëm te çmimet e parkimit: aeroportet Manchester dhe London Stansted renditen ndër tre më problematikët në Mbretërinë e Bashkuar për vonesa gjatë Pashkëve.
Në të dy aeroportet, pothuajse një e treta e fluturimeve u vonuan më shumë se 15 minuta gjatë kësaj periudhe, sipas Autoritetit të Aviacionit Civil në Mbretërinë e Bashkuar.
Në Bashkimin Evropian, aeroportet e Athinës dhe Lisbonës regjistruan vonesat më të mëdha në prill 2025, kryesisht për shkak të kufizimeve të kapacitetit në aeroporte, sipas Eurocontrol./Përshtati nga Euronews, ekofin.al

