Qeveria ka vendosur të ngarkojë Fondin Shqiptar të Zhvillimit (FSHZH) si autoritet kontraktor për realizimin e një prej projekteve më të rëndësishme urbane dhe kulturore në zemër të Tiranës: ndërtimin e Muzeut Arkeologjik nëntokësor, parkimit nëntokësor dhe rehabilitimin e sheshit “Nënë Tereza”.
Sipas VKM-së, Fondi Shqiptar i Zhvillimit do të kryejë të gjitha procedurat e prokurimit publik, në përputhje me legjislacionin në fuqi, duke përfshirë lidhjen e kontratave për projektimin, zbatimin dhe mbikëqyrjen e punimeve, si dhe ndjekjen e plotë të realizimit të projektit. Po ashtu, FSHZH do të paraqesë kërkesat për miratimin e lejeve të zhvillimit dhe të ndërtimit në emër të institucioneve publike përfituese pranë autoriteteve kompetente të zhvillimit të territorit, duke ndjekur të gjitha procedurat përkatëse.
Vendimi parashikon gjithashtu mundësinë e lidhjes së marrëveshjeve të bashkëpunimit mes Fondit Shqiptar të Zhvillimit, Ministrisë së Turizmit, Kulturës dhe Sportit dhe Bashkisë Tiranë, në funksion të zhvillimit të projektit.
Efektet financiare do të përballohen nga buxheti i miratuar për Fondin Shqiptar të Zhvillimit, ndërsa për zbatimin e vendimit ngarkohen Ministria e Turizmit, Kulturës dhe Sportit, Bashkia Tiranë dhe FSHZH.
Projekti synon të transformojë një nga hapësirat më simbolike të kryeqytetit, sheshin “Nënë Tereza”, duke integruar një muze arkeologjik nëntokësor – që pritet të ekspozojë dhe valorizojë trashëgiminë kulturore – me një parkim nëntokësor dhe ndërhyrje rehabilituese në sipërfaqe. Në aspektin ekonomik dhe urban, ky investim pritet të ketë ndikim të drejtpërdrejtë si në zhvillimin e turizmit kulturor, ashtu edhe në menaxhimin e trafikut dhe funksionalitetin e zonës universitare dhe institucionale që rrethon sheshin. Vendimi hyn në fuqi pas botimit në “Fletoren Zyrtare”.
