Themeluesi i Amazon dhe Blue Origin po merr pjesë në rolin e tij të parë operacional në një kompani që nga viti 2021, këtë herë në start-up-in e inteligjencës artificiale Project Prometheus, sipas një raporti.
Jeff Bezos po hyn zyrtarisht në garën e inteligjencës artificiale (AI) si bashkë-CEO i një start-up-i të ri që quhet Project Prometheus, sipas një lajmi të New York Times.
Kompania ka siguruar tashmë 6.2 miliardë dollarë (5.3 miliardë euro) financim, pjesërisht nga vetë Bezos, sipas tre burimeve anonime të afërta me projektin. Kjo do ta bënte atë një nga start-up-et më të financuara në fazat e hershme në botë.
Nëse konfirmohet, kjo do të ishte hera e parë që Bezos merr një rol operacional në një kompani që nga largimi i tij si CEO i Amazon në vitin 2021.
Miliarderi, i njohur për themelimin e Amazon dhe Blue Origin, ka shfaqur më parë interes për fushën e AI. Vitin e kaluar ai investoi në Physical Intelligence, një start-up që përdor inteligjencën artificiale për të fuqizuar robotët.
Elon Musk, i cili themeloi kompaninë e tij të AI-së, xAI, reagoi ndaj lajmit duke e quajtur rivalin e tij një “imitues” në një postim në platformën e tij sociale, X.
Aktualisht, ka shumë pak informacion publik rreth Project Prometheus, përfshirë vendndodhjen e kompanisë. Faqja e LinkedIn-it e start-up-it është pothuajse bosh, duke përmendur vetëm 51–200 punonjës dhe moton: “AI për ekonominë fizike”.
Sipas raportit të New York Times, kompania ka punësuar tashmë pothuajse 100 punonjës, përfshirë kërkues shkencorë nga kompani kryesore të AI si OpenAI, Google DeepMind dhe Meta.
Tre burimet që folën për gazetën shtuan se Project Prometheus do të fokusohet në aplikimin e AI për detyra fizike, duke përfshirë robotikën, dizajnin e barnave dhe zbulimet shkencore – ngjashëm me kompanitë si Periodic Labs me bazë në Kaliforni.
Ndryshe nga modelet gjuhësore të mëdha (LLMs) që analizojnë të dhëna, këto kompani duan të ndërtojnë sisteme AI që mësojnë nga bota fizike përmes provës dhe gabimit.
Bashkëthemeluesi dhe bashkë-CEO i Bezos në Project Prometheus është Vik Bajaj, i cili e ka përditësuar profilin e tij në LinkedIn duke përfshirë të dyja titujt. Ai e liston vendndodhjen e punës në San Francisko, Londër dhe Zyrih.
Fizikani dhe kimisti Bajaj ka punuar më herët me ekipin kërkimor X të Google, duke kontribuar në projekte si shërbimi i dërgesave me dron Wing dhe automjetet autonome Waymo. Ai është gjithashtu një nga themeluesit e Foresite Labs, një inkubator për start-up-e të AI-së dhe shkencës së të dhënave./Përshtati nga Euronews, ekofin.al
