Votuesit zviceranë kanë miratuar me rezultat të ngushtë një plan për të futur kartat e identitetit elektronik vullnetare.
Me të gjitha votat e numëruara, 50.4% e atyre që morën pjesë votuan pro propozimit, ndërsa 49.6% e refuzuan atë.
Afërsia e rezultatit ishte surprizë, pasi sondazhet kishin sugjeruar deri në 60% mbështetje për ID-të digjitale, të cilat kishin gjithashtu miratimin e qeverisë zvicerane dhe të dy dhomave të parlamentit.
Ky ishte votimi i dytë i Zvicrës për ID-të digjitale. Një propozim i mëparshëm ishte refuzuar në vitin 2021, mes shqetësimeve se të dhënat do të mbaheshin në mënyrë qendrore dhe do të kontrolloheshin kryesisht nga ofrues privatë.
Propozimi i rishikuar, i votuar të dielën, mban sistemin në duart e qeverisë. Të dhënat do të ruhen vetëm në smartphone-t e përdoruesve individualë, ndërsa përdorimi i ID-ve digjitale do të jetë opsional. Qytetarët mund të vazhdojnë të përdorin kartat kombëtare të identitetit, të cilat kanë qenë standard për dekada në Zvicër.
Për të lehtësuar më tej shqetësimet për privatësinë, autoritetet që kërkojnë informacion për një person – si p.sh. provë moshe apo kombësie – do të mund të shohin vetëm ato detaje specifike.
Ky zhvillim vjen pasi qeveria britanike njoftoi këtë javë planet për të futur ID digjitale të detyrueshme për punësim, si pjesë e përpjekjeve për të frenuar numrin e emigrantëve të paligjshëm që jetojnë dhe punojnë në vend. ID-ja britanike e propozuar do të kishte më pak përdorime sesa versioni zviceran, por sërish ka ngritur shqetësime mbi privatësinë dhe sigurinë e të dhënave.
Mbështetësit e sistemit zviceran thonë se ai do ta bëjë jetën shumë më të lehtë për këdo, duke lejuar një gamë procedurash burokratike – nga marrja e një kontrate telefoni deri te provimi i moshës për të blerë një shishe vere – të kryhen shpejt online.
Kundërshtarët e ID-ve digjitale, të cilët mblodhën nënshkrime të mjaftueshme për të detyruar një tjetër referendum mbi këtë çështje, argumentojnë se masa mund të minojë sërish privatësinë individuale. Ata frikësohen gjithashtu se, pavarësisht kufizimeve të reja mbi mënyrën e mbledhjes dhe ruajtjes së të dhënave, ato mund të përdoren për të ndjekur lëvizjet e njerëzve apo për qëllime marketingu.
Zvicra ka një traditë të gjatë në mbrojtjen e privatësisë së qytetarëve të saj. Ligjet mbi sekretin bankar – tashmë të zbehura – ishin krijuar për të mbrojtur financat personale nga ndërhyrja e shtetit. Për vite me radhë, Google Street View ka qenë objekt polemikash në Zvicër – dhe edhe sot, pas një vendimi të Gjykatës Federale Zvicerane, imazhet e marra pranë shkollave, strehave të grave, spitaleve apo burgjeve duhet të mjegullohen automatikisht përpara se të publikohen online./Përshtati nga BBC, ekofin.al
