Në muajin gusht 2024, inflacioni në Shqipëri ka arritur në 2%, duke shënuar nivelin më të ulët që nga qershori i vitit 2021. Ky raport, i publikuar nga INSTAT, tregon një ngadalësim të dukshëm të rritjes së çmimeve që ishte nën ndikimin e pandemisë COVID-19 dhe më pas të krizës në Ukrainë.
Sipas të dhënave të fundit, ndryshimi vjetor i indeksit të çmimeve të konsumit për gusht 2024 është 2%, një rënie e ndjeshme në krahasim me 4% që ishte një vit më parë. Ndryshimi mujor i çmimeve për gusht 2024, në raport me korrikun e po këtij viti, është 0.5%.
Rritja e çmimeve gjatë vitit të kaluar është ndikuar kryesisht nga grupi “ushqime dhe pije joalkoolike,” i cili kontribuoi me 0.86 pikë përqindje në rritjen e përgjithshme të çmimeve, ndjekur nga grupi “qira, ujë, lëndë djegëse dhe energji” me 0.29 pikë përqindje.
Në krahasim me gushtin e vitit të kaluar, grupet me rritjen më të madhe të çmimeve janë “argëtim dhe kulturë” me 4%, “veshje dhe këpucë” me 3.9%, dhe “pije alkoolike dhe duhan” me 3.6%. Ndërkohë, grupi “ushqime dhe pije joalkoolike” ka pësuar një rritje prej 2.4%. Ndër grupet e tjera, “shërbimi arsimor” dhe “mobilje, pajisje shtëpie dhe mirëmbajtje e shtëpisë” kanë pasur rritje më të ulët.
Në anën tjetër, çmimet në grupin “transporti” kanë shënuar një ulje prej 3.1%, që mund të pasqyrojë ndryshime në ofertë dhe kërkesë për shërbimet e transportit.
Në brendësi të grupit të ushqimeve, çmimet e zarzavateve dhe patateve janë rritur me 5.5%, ndjekur nga qumështi, djathi dhe vezët me 4.4%, dhe mishi me 3.1%. Krahasuar me korrikun 2024, çmimet e grupit “argëtim dhe kulturë” u rritën me 1.8%, ndërsa grupet e tjera si “ushqime dhe pije joalkoolike” dhe “veshje dhe këpucë” patën rritje më të moderuar.
