Gratë daneze tani përballen me thirrjen për 11 muaj shërbim ushtarak sapo të mbushin 18 vjeç, pas hyrjes në fuqi të një ndryshimi ligjor. Sipas rregullave të reja të miratuara nga parlamenti i Danimarkës, gratë do të përfshihen në të njëjtin sistem shorti si djemtë adoleshentë, që mund t’i detyrojë të kryejnë një periudhë shërbimi të detyrueshëm ushtarak.
Ky ndryshim është bërë në kuadër të rritjes së shpenzimeve për mbrojtjen nga vendet anëtare të NATO-s, për shkak të shqetësimeve të shtuara të sigurisë në Evropë. Deri tani, gratë lejoheshin të merrnin pjesë në shërbimin ushtarak pasi mbushnin 18 vjeç, por vetëm në mënyrë vullnetare.
Nga e marta, si burrat, ashtu edhe gratë që mbushin 18 vjeç do të duhet të regjistrohen për t’u vlerësuar për shërbim të mundshëm ushtarak. Fillimisht do të rekrutohen vullnetarët, ndërsa pjesa tjetër do të plotësohet përmes sistemit të shortit.
Ndryshimi parashikon gjithashtu që periudha e shërbimit ushtarak për adoleshentët të rritet nga katër muaj në 11 muaj. Rreth 4,700 burra dhe gra daneze kryen një periudhë të shkurtër shërbimi ushtarak në vitin 2024 – rreth 24% e tyre ishin gra vullnetare. Me rregullat e reja, pritet që numri i përgjithshëm i atyre që kryejnë shërbimin ushtarak çdo vit të rritet në 6,500 deri në vitin 2033.
Danimarka po ndjek shembullin e Suedisë dhe Norvegjisë fqinje, të cilat kanë përfshirë gratë në shërbimin e detyrueshëm ushtarak vitet e fundit. Qeveria daneze njoftoi gjithashtu në mars një rritje prej 40.5 miliardë kurona daneze (rreth 4.3 miliardë £ ose 5.9 miliardë $) të shpenzimeve për mbrojtjen gjatë pesë viteve të ardhshme, për të përmbushur objektivat e NATO-s. Aktualisht, rreth 9,000 persona profesionistë shërbejnë në ushtrinë daneze.
Koloneli Kenneth Strom, drejtues i programit të rekrutimit të ushtrisë daneze, tha se ky ndryshim “bazohet në një vendim politik dhe në një marrëveshje politike mes partive”. Ai shtoi: “Dhe natyrisht, kjo lidhet me situatën aktuale të sigurisë, për të rritur fuqinë luftarake dhe për të pasur aftësitë që nevojiten për Ushtrinë, Marinën, Forcat Ajrore apo edhe Forcat Speciale.”
Duke folur për agjencinë e lajmeve Reuters, Katrine, një vullnetare aktuale në ushtrinë e Danimarkës, tha: “Në situatën botërore ku ndodhemi tani, është e nevojshme të kemi më shumë të rekrutuar, dhe mendoj se gratë duhet të kontribuojnë njësoj si burrat. Mendoj se është një ndryshim pozitiv.”/Përshtati nga BBC, ekofin.al
