Postimet për vende pune që përmendin inteligjencën artificiale gjenerative (GenAI) janë rritur ndjeshëm në disa vende të Evropës gjatë vitit deri në mars 2025. Megjithatë, ekspertët theksojnë se inteligjenca njerëzore mbetet një kërkesë thelbësore në vendin e punës.
Të dhënat e fundit tregojnë një rritje të ndjeshme në përqindjen e postimeve të punës që përmendin GenAI gjatë dy viteve të fundit në Evropë, Amerikën e Veriut dhe Australi.
“Në një moment të caktuar, pothuajse çdo punë do të ndikohet nga AI (inteligjenca artificiale)”, tha Pawel Adrjan, Drejtor i Kërkimeve Ekonomike në platformën e punësimit Indeed.
Në ekonomitë kryesore evropiane, përqindja e postimeve të punës të lidhura me GenAI është më shumë se dyfishuar në 12 muajt deri në mars 2025, sipas të dhënave nga Indeed.
Çfarë janë vendet e punës të lidhura me GenAI?
Vendet e punës GenAI përfshijnë rolet që lidhen me zhvillimin, zbatimin ose mbikëqyrjen e teknologjive të inteligjencës artificiale gjenerative.
Këto mund të përfshijnë pozicione që ndërtojnë veçori të GenAI, apo role që shfrytëzojnë këtë teknologji për të rritur efikasitetin, si analizimi i të dhënave, përmbledhja e raporteve ose hartimi i materialeve të shkruara apo krijuese.
Irlanda në krye të Evropës
Irlanda është lidere në Evropë përsa i përket këtyre lloj vendeve pune. Të dhënat e Indeed tregojnë se, më 31 mars 2025, mbi 0.7% e postimeve të punës në Irlandë përfshinin terma të lidhur me GenAI — një rritje prej 204%, më shumë se trefishim brenda një viti.
Për krahasim, hapjet për kuzhinierë përbëjnë 1.1% të totalit të postimeve, për shoferë kamioni 0.8% dhe për kamarierë 0.6%.
Këto të dhëna tregojnë pozicionin udhëheqës të Irlandës në inovacionin digjital në tregun e punës në Evropë.
Si u bë Irlanda një qendër për GenAI?
“Pozicioni i Irlandës si lider në postimet për punë GenAI reflekton sektorin e zhvilluar të teknologjisë në vend dhe rolin e saj si bazë evropiane për shumë kompani globale,” tha Adrjan për Euronews Business.
Me një përqendrim të lartë të punëdhënësve në teknologji — nga gjigantë si Alphabet, Amazon, Apple, Meta, IBM, Intel, Microsoft, Oracle, Salesforce e Tencent — rritja e kërkesës për role në GenAI është e pritshme.
Rritje në Gjermani, Mbretërinë e Bashkuar dhe Francë
Gjermania, Mbretëria e Bashkuar dhe Franca ndjekin Irlandën me ritme të larta rritjeje, por përqindjet mbeten më të ulëta: Mbretëria e Bashkuar: 0.33% e postimeve, +120% nga një vit më parë; Gjermania: 0.23%, +109%; Franca: 0.21%, +91%.
Cilat profesione përmendin më shumë GenAI?
Në Irlandë, rolet më të lidhura me GenAI janë: Matematikë (14.7%); Zhvillim softuerësh (4.9%); Media dhe komunikim (3.9%); Arkitekturë (2.4%); Kërkim dhe zhvillim shkencor (2.1%)
Fusha të tjera përfshijnë inxhinierinë industriale, ligjin, marketingun, informacionin mjekësor dhe prodhimin.
Inteligjenca njerëzore mbetet thelbësore
Adrjan shpjegon se popullsitë në plakje dhe mungesat në tregun e punës po e bëjnë gjithnjë e më të domosdoshme qasjen e rekrutimit të bazuar në aftësi, duke përfshirë AI si ndihmë.
Megjithatë, ai thekson: “Mjetet GenAI janë burime të shkëlqyera për të rritur efikasitetin, por janë të kufizuara krahasuar me ekspertizën njerëzore.”
Në çfarë mase mund të zëvendësojë GenAI punonjësit?
Një kërkim i përbashkët nga Indeed dhe Forumi Ekonomik Botëror tregon se rreth 69% e aftësive të punës nuk mund të zëvendësohen nga GenAI.
Aftësi që kanë probabilitet të lartë zëvendësimi përfshijnë leximin, shkrimin dhe matematikën, ndërsa aftësi si përpunimi i ndjesive, empatia dhe dëgjimi aktiv konsiderohen të pazëvendësueshme nga AI./Përshtati nga Euronews, ekofin.al
