Uljan Sharka, një djalosh i ri shqiptar ka krijuar kompaninë e parë të inteligjencës artificiale me vlerë mbi 1 miliardë euro në Itali. E quajtur iGenius, kompania e themeluar nga Sharka rezulton se është kategorizuar së fundmi edhe si njëbrirëshi i parë i shpallur i inteligjencës artificiale në Itali. Kompania arriti të mbledhë 650 milionë euro në fonde të reja, ndërsa vlera tregtare e saj ka kapërcyer për herë të parë shumën minimale të kërkuar prej 1 miliardë dollarësh, për t’u kategorizuar si “unicorn”, njëbrirësh.
Mes bashkëpunëtorëve dhe njëkohësisht mbështetësve dhe investitorëve të parë të kompanisë së drejtuar nga shqiptari iGenius, rezulton të jetë grupi më I madh bankar në Itali, Intesa Sanpaolo, përmes shoqërisë së saj të menaxhimit të aseteve, ndër më të mëdhatë në Europë, Eurizon Asset Management. Kjo shoqëron operon së fundmi edhe në Shqipëri, me agjent për të marketuar dhe shpërndarë fondet europiane Intesa Sanpaolo Bank Albania.
Në shtator të vitit të kaluar, Intesa Sanpaolo, si banka më e madhe në Itali, njoftoi nënshkrimin e një partneriteti strategjik me iGenius, në funksion të përdorimit të inteligjencës artificiale në inovacion dhe biznes. Intesa Sanpaolo filloi në këtë mënyrë përdorimin e “Crystal”, e cila bazuar në teknologjinë GPT arrin të krijojë analiza të thelluara dhe sisteme efektive vendimarrëse. Platforma është në gjendje të procesojë sasi shumë të mëdha të dhënash, duke gjeneruar prej tyre zgjidhje të targetuara për projektet e biznesit të bankës.
Përveç implementimit të zgjidhjeve të biznesit, të ofruara përmes inteligjencës artificiale të kompanisë iGenius, grupi bankar Intesa Sanpaolo ka mbështetur përmes gjenerimit të konsiderueshëm të fondeve kompaninë e drejtuar nga shqiptarja Uljan Sharka, duke i besuar që në fazën kur ajo konsiderohej si një start-up.
I njohur për modelet e tij më të avancuara të Inteligjencës Artificiale që i japin përparësi besueshmërisë dhe sigurisë së të dhënave, iGenius lançoi kohët e fundit modelin “Italia”, një model i gjuhës së madhe me burim të hapur (Llm) i krijuar për kompanitë në sektorin e Financës dhe administratës publike. Ky është një model i ngjashëm me atë të ChatGpt i zhvilluar nga OpenAI amerikan.
“Me këtë rritje të kapitalit, sot ne bëjmë një hap të madh përpara për të nxitur përparimin tonë Inteligjencën Artificiale për industritë e rregulluara. Qëllimi ynë është t’i bëjmë të dhënat njerëzore, të ripërcaktojmë të ardhmen e punës dhe të mbyllim hendekun e aftësive, duke u mundësuar individëve dhe bizneseve të arrijnë lartësi të reja, “tha Uljan Sharka, CEO i iGenius.
iGenius po punon me disa kompani për të zbatuar modelin e tij. Mes tyre janë edhe gjigandët e Intesa Sanpalo, Allianz, Aon, Enel, etj. Qëllimi i deklaruar nga iGenius është të arrijë 20 milionë euro të ardhura vjetore periodike deri në fund të 2024. Angazhimi i kompanisë për të ofruar zgjidhje të besueshme dhe të shkallëzueshme të Inteligjencës Artificiale ka tërhequr klientët e Fortune 500. Ekofin.al
