Sipas njoftimeve të medias vendase, një automjet pasagjerësh goditi njerëzit e mbledhur për një protestë. Shumë njerëz janë plagosur në Mynih pasi një makinë u përplas me një turmë demonstruesish pranë qendrës së qytetit, tha policia.
Shoferi u arrestua në vendngjarje dhe nuk përbënte rrezik të mëtejshëm, konfirmuan autoritetet. Policia e Mynihut tha në X se ata ishin aktualisht në vend me “forca të fuqishme”.
Mediat lokale raportojnë se një person ka humbur jetën dhe disa të tjerë janë plagosur rëndë. Bayerischer Rundfunk (BR) tha se të paktën 20 persona ishin plagosur, duke cituar shërbimet e urgjencës. Ata shtuan se shifrat e sakta ishin të vështira për t’u konfirmuar, pasi shumë njerëz të lënduar kishin ikur në ndërtesat përreth për mbrojtje. Shërbimet e urgjencës konfirmuan se ka pasur të lënduar të shumtë, por autoritetet nuk kanë bërë të ditur për ndonjë të vdekur për momentin. Ata i kërkuan publikut që të përmbahet nga spekulimet.
Thuhet se turma po protestonte në një marshim të organizuar nga një nga sindikatat më të mëdha të Gjermanisë. BR tha se oficerët po hetonin nëse kishte një lidhje midis demonstratës dhe incidentit. Qyteti bavarez do të presë shumë liderë botërorë, duke përfshirë presidentin ukrainas Volodymyr Zelenskyy dhe nënpresidentin e SHBA JD Vance, për konferencën e sigurisë në Mynih nga e premtja deri të dielën./ Euronews
