OTP Bank Shqipëri, pjesë e grupit hungarez OTP vijon performancën e mirë në tregun bankar, duke përmirësuar ndjeshëm treguesit kryesorë financiarë.
Referuar të dhënave për 9-mujorin të publikuara nga grupi, OTP Bank Shqipëri gjeneroi një fitim neto prej 37 milionë euro, me një rritje prej 45% me monedhën lokale, në krahasim me 9-mujorin e vitit të kaluar, si edhe 62% nëse llogaritjet bëhet me monedhën hungareze (forinta). Në këtë mënyrë, OTP Shqipëri ka tejkaluar ndjeshëm fitimin e arritur përgjatë gjithë vitit të kaluar, i vlerësuar në afro 28.5 milionë euro.
Vetëm në 3-mujorin e tretë të vitit, fitimi neto arriti në 12.4 milionë euro, nga 5.3 milionë që ishte në të njëjtin 3-mujor të vitit të kaluar, me një rritje prej 134% i llogaritur me monedhën hungareze, konvertuar në euro.
Referuar të dhënave më të fundit, OTP është banka e tretë më e madhe në Shqipëri për portofol kredie, duke tejkaluar vlerën prej 1 miliardë euro.
Asetet totale të bankës arritën në 1.88 miliardë euro në fund të 9-mujorit, nga 1.6 miliardë euro që ishin në të njëjtën periudhë të vitit të kaluar, me një rritje prej 14%.
Banka ka patur një rritje dhe përmirësim të treguesve kryesore të performancës për të arritur shifra të tilla fitimi në fund të 9-mujorit të tretë të këtij viti. Kështu, të ardhurat nga interesat neto në fund të shtatorit arritën në 60 milionë euro, ose 23% më shumë sesa e njëjta periudhë e vitit të kaluar, kur ishin rreth 49 milionë euro.
Gjithashtu, OTP ka përmirësuar treguesit e profitabilitetit, ROE, i cili nga 18.2% në fund të 9-mujorit të vitit të kaluar ka shëkuar në 21.6% në fund të shtatorit të këtij viti. Përmirësim shënoi edhe ROA, nga 2% në 2.8%. Gjithashtu raporti i eficiencës së bankës që mat shpenzimet dhe fitimet u ul ndjeshëm nga 52.5% në fund të 9-mujorit të vitit të kaluar në 41.7% në fund të shtatorit të këtij viti.
Banka ka ulur me 13% shpenzimet operative në 9-mujorin e parë të vitit, krahasuar me të njëjtën periudhë të vitit të kaluar dhe në anën tjetër ka rritur më tej kreditimin, që i ka sjellë asaj edhe më shumë të ardhura. Sa i përket portofolit të kredisë, kredia për biznesin vijon të jetë dominuese, duke arritur në 529 milionë euro në fund të 9-mujorit, përkundrejt 465 milionë euro që është kredia retail për individët. /ekofin.al
