Në 2023, rezultojnë 870 persona të cilët kanë hequr dorë nga shtetësia shqiptare, duke u rritur me 20.7% krahasuar me vitin 2022. Numri i personave që kanë lënë shtetësinë ka patur një tendencë në rritje, duke arritur rekord në vitin 2023, nëse analizojmë shtatë vitet e fundit.
Të dhënat janë raportuar nga Drejtoria e Azilit të të Huajve dhe Shtetësisë në Ministrinë e Brendshme. Në vitin që lamë pas rezultojnë 1,382 persona të cilët kanë fituar shtetësi shqiptare, duke shënuar rënie me 9.5%, krahasuar me vitin 2022. Ndërkohë, po të rikujtojmë shifrat e vitit 2022, paraqitej një rritje e personave që kishin fituar shtetësinë me gati 114%.
Rreth 74.7% e shtetasve që kanë fituar shtetësinë Shqiptare janë nga Kosova, 7.2% nga Turqia, 2.8% nga Maqedonia dhe 4.1% nga Siria. Siç vihet re, ka një rritje të numrit të personave nga Siria të cilët kanë fituar shtetësinë Shqiptare.
Gjithnjë sipas shifrave të raportuara nga kjo strukturë, janë 261 persona që kanë aplikuar për azil në vendin tonë gjatë vitit 2023, më shumë se dyfish krahasuar me vitin 2022. Numri më i lartë i shtetasve që kanë aplikuar për azil janë ata nga Afganistani, ndjekur nga Siria dhe Iraku. Ekofin.al
