Shqiptarët po blejnë gjithnjë e më shumë makina elektrike dhe hibride, duke ndryshuar gradualisht profilin e flotës automobilistike në vend. Të dhënat më të fundit të Drejtorisë së Përgjithshme të Shërbimeve të Transportit Rrugor tregojnë se gjatë periudhës janar-prill 2026, autoveturat Electric Hybrid Plug-in me 0 kilometra përbënin 81.2% të totalit të mjeteve të reja të regjistruara në Shqipëri.
Sipas statistikave zyrtare, ky segment ka shënuar një rritje me 26.7% krahasuar me të njëjtën periudhë të vitit 2025, duke konfirmuar një trend të ri të orientimit të konsumatorëve drejt automjeteve me konsum më të ulët karburanti dhe emetime më të reduktuara.
Rritja e fortë e regjistrimeve të makinave hibride dhe elektrike po lidhet me disa faktorë njëkohësisht. Së pari, tregu shqiptar po ndjek të njëjtën prirje që po dominohet në Europë, ku prodhuesit automobilistikë po shtyjnë gjithnjë e më shumë modelet elektrike dhe hibride në vend të motorëve tradicionalë me naftë apo benzinë. Së dyti, kostot më të ulëta të përdorimit dhe kursimi në karburant po bëhen një argument gjithnjë e më i rëndësishëm për konsumatorët shqiptarë.
Një tjetër faktor lidhet edhe me ofertën në tregun e importit. Shumë nga automjetet e reja apo pothuajse të reja që po hyjnë në Shqipëri janë tashmë modele hibride plug-in apo elektrike, pasi edhe tregjet europiane po largohen gradualisht nga teknologjitë tradicionale të motorëve me djegie.
Rritja e peshës së automjeteve “green” mund të ndikojë gradualisht edhe në uljen e konsumit të karburanteve në vend, sidomos në zonat urbane ku përdorimi i automjeteve është më intensiv. Në të njëjtën kohë, kjo prirje po krijon nevojë edhe për zgjerimin e infrastrukturës së karikimit elektrik, e cila vijon të mbetet ende e kufizuar jashtë qyteteve kryesore.
Tregu automobilistik shqiptar ka qenë tradicionalisht i dominuar nga automjetet e përdorura me naftë, por statistikat e viteve të fundit tregojnë se tranzicioni drejt mjeteve hibride dhe elektrike po përshpejtohet. Pesha prej mbi 81% e automjeteve të reja të regjistruara në kategorinë Electric Hybrid Plug-in tregon se teknologjia e re nuk konsiderohet më një zgjedhje elitare, por po kthehet gradualisht në standardin e ri të tregut. /ekofin.al
