Shoqëria Albsig ka rritur ndjeshëm peshën e saj në tregun e sigurimeve, duke zotëruar në 6-mujorin e parë të vitit 2023, 20.66% të totalit të tregut të Jo-Jetës, sa i përket primeve të shkruara bruto. Në të njëjtën periudhë të një viti më parë, rezultonte që kjo shoqëri të kishte 18.42% të totalit të primeve të tregut. Me mbi 2 milionë euro prime të shkruara bruto në 6 muajt e parë të vitit, Albsig rezulton të jetë shoqëria me rritjen më të fortë, prej rreth 26%. Krahasuar me vitin 2021, zgjerimi i shoqërisë rezulton të jetë edhe më i ndjeshëm, pasi në atë periudhë, Albsig zotëronte 17.63% të primeve të shkruara bruto të gjithë tregut të Jo-Jetës.
Ky zgjerim i Albsig, e cila prej vitesh qëndron në vend të dytë si kompania më e madhe e sigurimeve në vend, ka bërë që ajo të ngushtojë ndjeshëm diferencën me Sigalin e vendit të parë. Kjo ka ardhur kryesisht për shkak të rritjes së konsiderueshme të kompanisë së zotëruar nga Kastrati Group në linjat e sigurimeve vullnetare, të cilat zënë 61% të portofolit të primeve për këtë shoqëri, duke e renditur atë në vend të parë në tregun e Jo-Jetës për këto kategori sigurimi. Albsig kryeson në prime në produktet Kasko, përgjegjësi civile, përgjegjësi në ndërtim, si edhe sigurimin e garancive, ndërsa vijon të ketë rritje konstante në sigurimin e pronës.
Gjithashtu, sa i përket sigurimeve të detyrueshme, ato që zënë edhe pjesën kryesore të tregut të sigurimeve, shoqëria për janar-qershorin 2023, në sigurimet motorike ka shënuar rritjen më të madhe në nivel tregu, me 10.67%, krahasuar me të njëjtën periudhë të një viti më parë. Për 6-mujorin e parë të këtij viti, në sigurimet motorike, shoqëria ka siguruar mbi 1 milionë euro prime.
Paralelisht me rritjen dhe zgjerimin e Albsig sa i përket primeve të shkruara bruto, shkojnë edhe dëmet e paguara për 6-mujorin, që rezultojnë në rreth 437 milionë lekë, me një rritje prej 10% krahasuar me të njëjtën periudhë të një viti më parë. Për janar-qershor 2023, shoqëria ka trajtuar dhe paguar afron 6 mijë praktika dëmesh. Po ashtu Albsig, vijon të jetë shoqëria me numrin më të ulët të dëmeve pezull, vetëm 258, duke ulur gjithashtu edhe stokun e dëmeve pezull në vlerë në vetëm 224 milionë lekë. Edhe referuar Fondit të Kompensimit, te kategoria e dëmeve që paguhen përmes siguruesit të drejtpërdrejtë, si një risi e ligjit të sigurimeve që hyri në fuqi në korrik 2021, Albsig rezulton të ketë vlerën më të ulët të dëmeve pezull. /ekofin.al
