Të dhënat e 5-mujorit të parë të vitit për tregun e sigurimeve, të publikuara nga AMF, nxjerrin në pah se shoqëritë që operojnë në treg, kryesisht atë të Jo-Jetës, që ka edhe impaktin kryesor sa i përket primeve të shkruara bruto, janë rritur me ritme të ndryshme.
Vihet re se përgjithësisht tregu ka shënuar rritje sa i përket sigurimeve motorike, që në total janë rritur me rreth 14%. Por diferenca duket se është bërë te produktet e tjera të sigurimit, që kombinuar edhe me zhvlerësimin e euros, krahasuar me të njëjtën periudhë të vitit 2023, kanë sjellë ndikime në tregun e sigurimeve.
Në rang tregu, Sigma VIG rezulton të ketë shënuar rritjen më të fortë, me afro 16.7% krahasuar me të njëjtën periudhë të një viti më parë, sa i përket primeve të shkruara bruto. Kjo për shkak të një performancë shumë të mirë në sigurimin motorik, ku shoqëria ka patur në 5-mujorit rritjen më të madhe në treg, prej afro 17% (ndikuar nga rritja konstante e produkteve kryesore të këtij sigurimi, tpl, karton jeshil dhe kufitare, por edhe rritja e sigurimit Kasko).
Por, ajo që bie në sy është rritja që Sigma ka shënuar gjatë këtij viti në sigurimet vullnetare, në veçanti sa i përket sigurimit të pronës, aty ku shumica e tregu shënon rënie, kjo edhe ndikuar nga zhvlerësimi i euros. Në këtë portofol, Sigma ka arkëtuar prime me vlerë 141 milionë lekë në 5-mujor, me një rritje prej 22.6% krahasuar me të njëjtën periudhë të vitit të kaluar. Një paraqitje të mirë, shoqëria ka bërë edhe sa i përket sigurimit të përgjegjësive civile.
Tregu i sigurimeve u rrit me 4.5% në 5-mujor, duke shfaqur shenja përshpejtimi, edhe pse gjatë këtij viti rritja deri tani nuk është me të njëjtin ritëm si vitet e fundit dhe kjo kryesisht edhe për shkak të impaktit që ka nisur të japë kursi i euros, duke qënë se një pjesë e mirë e produkteve, si sigurimi i pronës, Kartoni Jeshil, etj. tregtohen në euro. Ekofin.al
