Gjigandi hungarez i telekomunikacionit, 4iG Group, njoftoi se ka vendosur një partneritet me kompaninë e njohur suedeze Ericsson për të implementuar rrjetin e teknologjisë 5G në Shqipëri. Kjo teknologji e përparuar do të ofrohet nga kompania One Albania, pjesë e 4iG.
One Albania u bë operatori i parë në Shqipëri që prezantoi shërbimet 5G në 25 nëntor 2024. Frekuencat e reja u blenë për 5.4 milionë Euro, përmes ankandit të realizuar nga AKEP, ndërsa tashmë paketa e teknologjisë së fundit 5G do të jetë tërësisht funksionale, përmes investimeve në bashkëpunim me gjigandin teknologjik Ericsson.
“Ky është një tjetër udhëtim afatgjatë, të cilin e nisim sot me Ericsson, i cili ka qënë një partner afatgjatë teknologjik në Shqipëri. 4iG Group është një grup rajonal i telekomunikacionit, me prezencë të fortë në Ballkanin Perëndimor. Shqipëria është një nga tregjet tona kryesore, ndaj ne duhet të marrim në konsideratë aspektet ligjore dhe politike, kur bëhet fjalë për vendimet tona strategjike,” u shpreh Péter Fekete, CEO i 4iG Group.
“Kjo marrëveshje nënvizon përkushtimin e Ericsson për të avancuar me zbatimin e 5G në vend. Përmes implementimit të 5G, ne do të mundësojmë ndërlidhje me të shpejtë, më të besueshme dhe më të qëndrueshme, duke hedhur themelet për shërbimet e gjeneratës tjetër. Ndërkohë që kërkesa për rrjetet e performancës së lartë rritet, partneriteti ynë me One Albania, filial i 4iG Group, do të mbështesë nevojat në rritje të konsumatorëve dhe bizneseve,” u shpreh Antonio Passarella, Drejtues për Ballkanin Perëndimor, Ericsson.
Investimi me vlerë mbi 50 milionë Euro nis me sigurimin me përparësi të mbulimit 5G në zonave strategjike, si portet dhe aeroportet, zonat industriale, zonat spitalore në Tiranë, si edhe zonat më të vizituara bregdetare.
Sipas planit të investimeve, do të vazhdojë me implementimin e rrjetit 5G në të gjitha qytetet e Shqipërisë brenda vitit 2028, për të arritur një mbulim të popullsisë në masën 85% në fund të vitit 2030. /ekofin.al
