Në Shqipëri janë afro 84.400 individë të regjistruar si punëkërkues të papunë në zyrat e punës. Shifrat i përkasin vitit 2021, bilanci i të cilit është publikuar së fundmi nga Agjencia Kombëtare për Punësim dhe Aftësi.
Sipas të dhënave zyrtare, rezulton se nga kjo shifër totale, 43.900 prej tyre janë punëkërkues afatgjatë, që do të thotë se kanë një vit dhe më shumë në pritje të një vendi pune dhe ende nuk e kanë gjetur atë.
Ndërsa 27.576 trajtohen me ndihmë ekonomike dhe nuk kanë shumë motivim pë të gjetur një vend pune, duke qenë se nuk duan të humbasin mbështetjen financiare nga shteti. Nga ana tjetër, afro 7600 të papunë të regjistruar i përkasin komunitetit rom dhe egjyptian.
Duke e analizuar regjistrin e punëkëkruesve të papunë sipas moshës dhe arsimit, vihet re se rreth 47% e totalit të punëkërkuesve të papunë janë mbi 45 vjeç dhe 56% me arsim deri në 9 vjeçar, çka e vështirëson integrimin e tyre në tregun e punës.
