Tirana u kthye këtë të martë në një pikë takimi të industrisë izraelite të teknologjisë dhe sigurisë kibernetike, teksa mbi 40 kompani inovative nga Izraeli morën pjesë në Samitin Shqipëri-Izrael, me fokus forcimin e bashkëpunimit në teknologji, inovacion dhe mbrojtje kibernetike. Eventi solli në kryeqytet përfaqësues të kompanive të avancuara izraelite, në një moment kur Shqipëria po kërkon të forcojë më tej kapacitetet e saj digjitale dhe mbrojtjen ndaj sulmeve kibernetike.
Në fjalën e tij, Kryeministri Edi Rama e cilësoi ardhjen e kompanive izraelite si një lajm shumë të mirë për Shqipërinë, duke theksuar se vendi e ka ndërtuar strategjinë e zhvillimit mbi teknologjinë dhe digjitalizimin, si një mënyrë për të kapërcyer më shpejt sfidat e zhvillimit ekonomik.
“Vendet nuk dallojnë me njëri-tjetrin në bazë të asaj çfarë zotërojnë, por në bazë të asaj që dinë”, citoi Rama ekonomistin Ricardo Hausmann, ndërsa vlerësoi Izraelin si shembullin më domethënës të një ekonomie të ndërtuar mbi dijen dhe inovacionin.
Samiti u fokusua veçanërisht tek siguria kibernetike, një fushë që mori rëndësi strategjike për Shqipërinë pas sulmeve iraniane ndaj infrastrukturës digjitale shqiptare në vitin 2022. Rama tha se Shqipëria “e zbuloi sigurinë kibernetike në mënyrën më të vështirë”, pas sulmit që synonte të paralizonte sistemin online të shërbimeve publike.
Kryeministri kujtoi se Shqipëria kishte pranuar disa mijëra iranianë opozitarë për arsye humanitare, ndërsa sulmi kibernetik erdhi si hakmarrje nga regjimi iranian. Sipas tij, objektivi ishte shkatërrimi i transformimit digjital të administratës publike shqiptare.
“U bëmë një vend që 95% të shërbimeve i ofron online dhe këtë synuan ata ta shkatërronin”, deklaroi Rama.
Ai vlerësoi ndihmën e Izraelit, Emirateve të Bashkuara Arabe dhe ekspertëve amerikanë në përballimin e sulmit, duke shtuar se bashkëpunimi me ekspertizën izraelite ka ndihmuar Shqipërinë të ndërtojë një nivel krejt tjetër të mbrojtjes kibernetike.
Në samit, Rama e lidhi bashkëpunimin me Izraelin edhe me historinë e marrëdhënieve mes dy popujve, duke kujtuar se Shqipëria ishte vendi i vetëm në Europë që doli nga Lufta e Dytë Botërore me më shumë hebrenj sesa kishte përpara nisjes së saj. Ai theksoi se Shqipëria mbetet një vend pa antisemitizëm dhe “shtëpi për hebrenjtë”.
Përtej sigurisë, samiti kishte edhe një dimension ekonomik. Qeveria shqiptare synon të tërheqë më shumë investime izraelite në sektorët e teknologjisë, inovacionit dhe shërbimeve digjitale, në një kohë kur vendi po përpiqet të pozicionohet si një qendër rajonale për teknologjinë dhe ekonominë digjitale.
Rama zbuloi gjithashtu se vizitorët hebrenj në Shqipëri janë rritur me 700% në vitet e fundit, ndërsa fluturimi direkt mes dy vendeve pritet të shtojë më tej shkëmbimet ekonomike dhe turistike.
Samiti konsiderohet një tjetër sinjal i afrimit strategjik mes Shqipërisë dhe Izraelit, me fokus jo vetëm teknologjinë dhe sigurinë, por edhe investimet dhe transformimin digjital të ekonomisë shqiptare. /ekofin.al
