Administrata Tatimore ka mbyllur muajin korrik me rezultate pozitive në arkëtimin e të ardhurave, duke tejkaluar si planin e miratuar për vitin 2025, ashtu edhe realizimin e vitit të kaluar.
Sipas të dhënave zyrtare, në korrik 2025 janë arkëtuar gjithsej 39 miliardë lekë, duke përfaqësuar një rritje prej 17% krahasuar me korrikun e vitit 2024 ose 4.7% më shumë se plani i parashikuar për këtë muaj.
Sipas të dhënave nga tatimet, të ardhurat për korrikun janë 1.7 miliardë lekë më shumë sesa parashikimi mujor për korrikun 2025, si edhe 5.6 miliardë lekë më shumë sesa arkëtimet e korrikut 2024.
Këto rezultate tregojnë performancën pozitive të Administratës Tatimore dhe përmirësimin në mbledhjen e të ardhurave në raport me objektivat fiskalë dhe aktivitetin ekonomik të vendit.
Së fundmi, tatimet kanë nisur një sërë kontrollesh në subjektet që tregtojnë produkte bujqësore dhe blegtorale për zbatimin e legjislacionit në fuqi dhe formalizimin e sektorit. Gjithashtu përgjatë muajve të sezonit veror, tatimet kanë njoftuar planin operacional për sektorin e turizmit. /ekofin.al
