Kriptomonedhat janë ndër klasat më të paqëndrueshme dhe inovative të aseteve të dekadës së fundit. Edhe pse ekzistojnë mijëra monedha/tokene, vetëm disa prej tyre zotërojnë pjesën më të madhe të vlerës së tregut.
Të dhëna nga CoinGecko ofrojnë një pamje të hierarkisë së kriptove deri më 25 korrik 2025, nga ku vërehet dominimi i lojtarëve kryesorë si Bitcoin dhe Ethereum, ndërsa tregohet gjithashtu larmishmëria e tokeneve të shtresës së parë (Layer 1), stablecoin-eve dhe memecoin-eve në këtë përzierje.

Bitcoin dominon tregun e kriptomonedhave me 2.36 trilionë dollarë
Me mbi 2.3 trilionë dollarë kapitalizim tregu, Bitcoin vazhdon të qëndrojë në majë të tregut të kriptove.
Siç tregohet në të dhënat më poshtë, vlera e tij është më shumë se pesë herë më e lartë se ajo e Ethereum-it, tokeni i dytë më i madh.
Pavarësisht teknologjive dhe konkurrentëve të rinj, Bitcoin mbetet aktivi kryesor për shkak të pranimit të gjerë dhe strukturës së tij me furnizim të kufizuar. Dominimi i tij pasqyron gjithashtu interesin e fortë institucional për këtë kriptomonedhë, pasi shumë menaxherë aseteve e përfshijnë tashmë Bitcoin-in në portofolët e tyre të investimeve dhe ETF-të.
Ethereum qëndron fuqishëm në vendin e dytë me 435 miliardë dollarë. Si një platformë për kontrata të zgjuara (smart contracts), ai fuqizon një pjesë të madhe të ekosistemeve të financës së decentralizuar (DeFi) dhe NFT-ve. Platforma të tjera të shtresës së parë si Solana dhe Tron gjenden gjithashtu në top 20, secila me kapitalizim tregu prej miliarda dollarësh.
Këto platforma konkurrojnë për të ofruar transaksione më të shpejta dhe tarifa më të ulëta, duke synuar të bëhen baza për aplikacionet e decentralizuara të gjeneratës së ardhshme.
Stablecoin-e dhe Memecoin-e ndër kriptomonedhat më të mëdha
Tether dhe USD Coin, dy nga stablecoin-et më të njohura, vazhdojnë të luajnë një rol thelbësor duke ofruar likuiditet dhe stabilitet çmimi brenda ekosistemit të kriptove. Së bashku, ato përbëjnë mbi 180 miliardë dollarë kapitalizim tregu.
Ndërkohë, Dogecoin—një kriptomonedhë e lindur nga kultura e internetit—vazhdon të mbajë një vend në dhjetëshen e parë me 37 miliardë dollarë, duke nënvizuar ndikimin e spekulimeve të drejtuara nga komuniteti në këtë hapësirë./Përshtati nga Visual Capitalist, ekofin.al

