Gjatë vitit 2024, sipas të dhënave të publikuara nga INSTAT në Shqipëri janë regjistruar 22.102 vdekje, duke shënuar një rritje prej 3,8 %, krahasuar me vitin 2023 ku regjistroheshin 21.286 vdekje.
Shkaqet e vdekjeve në vitin 2024:
• 97,0 % e vdekjeve kanë ndodhur si pasojë e shkaqeve natyrale, duke shënuar një rritje prej 0,4 pikë përqindje, krahasuar me vitin 2023;
• 1,9 % si pasojë e aksidenteve, duke shënuar një ulje prej 0,5 pikë përqindje;
• 0,2 % nga vrasjet, në të njëjtin nivel me vitin 2023;
• 0,9 % si pasojë e vetëvrasjeve, krahasuar me 0,8 % në vitin 2023.
Vdekshmëria foshnjore
• Janë regjistruar 110 vdekje foshnjore në vitin 2024, nga 144 në vitin 2023;
• Norma e vdekshmërisë foshnjore ishte 4,7 për 1.000 lindje të gjalla në 2024, nga 6,1 për 1.000 në vitin 2023.
Vdekshmëria sipas grup-sëmundjeve
• Sëmundjet e aparatit të qarkullimit të gjakut përbënin 52,9 % të totalit të vdekjeve në 2024, nga 51,7 % në vitin 2023. Brenda këtij grupi:
o Sëmundjet kronike të zemrës: 39,1 %;
o Sëmundjet ishemike të zemrës: 23,2 %;
o Sëmundjet e enëve të trurit: 20,6 %.
• “Simptoma, shenja dhe sëmundje të papërcaktuara mirë” zënë vendin e dytë të vdekjeve me 21,5%. Brenda këtij grupi, vdekjet nga pleqëria përbëjnë 70,7 %.
• Grupi “Tumoret” renditet në vend të tretë. Brenda këtij grupi:
o Tumoret malinje të aparatit të tretjes: 34,6 %;
o Tumoret malinje të aparatit të frymëmarrjes: 23,9 %;
o Tumoret malinje të organeve urogjenitale: 15,1 %.
Vdekshmëria sipas gjinisë
• Sëmundjet e aparatit të qarkullimit të gjakut janë shkaku kryesor i vdekjeve për të dyja gjinitë;
• Simptomat dhe sëmundjet e papërcaktuara mirë janë më të shpeshta te femrat;
• Tumoret shkaktojnë më shumë vdekje te meshkujt.
Vdekshmëria sipas moshës
• Për grupmoshën 0-19 vjeç, dominon grupi “Sëmundje që shfaqen në periudhën rreth lindjes” me 30,8 %, i ndjekur nga sëmundjet e aparatit të qarkullimit të gjakut me 26,2 %;
• Për grupmoshën 20-44 vjeç, dëmtimet traumatike dhe helmimet përbëjnë 28,0 %, ndërsa sëmundjet e aparatit të qarkullimit të gjakut zënë 32,7 %./ekofin.al
