Këshilli i Ministrave ka miratuar sot vendimin që përcakton rregullat, kriteret dhe masën e kompensimit të kontributeve për punëdhënësit, si pasojë e rritjes së pagës minimale në shkallë vendi nga 40 mijë në 50 mijë lekë. Vendimi synon të zbusë efektet financiare për bizneset dhe të mbështesë stabilitetin e tregut të punës gjatë periudhës tranzitore të vitit 2026.
Sipas vendimit të qeverisë, skema e kompensimit parashikon mbështetje financiare për subjektet private në të gjithë sektorët ekonomikë, për të mbuluar koston shtesë që krijohet nga rritja e detyrimeve për kontributet e sigurimeve shoqërore dhe shëndetësore si rezultat i rritjes së pagës minimale.
Objektivi kryesor i këtij akti është të mbështesë bizneset që kanë të punësuar punonjës me pagë minimale, duke synuar ruajtjen e stabilitetit ekonomik, vijimësinë e aktivitetit dhe mbrojtjen e vendeve të punës. Nëpërmjet këtij mekanizmi, qeveria synon gjithashtu të shmangë rritjen e informalitetit në tregun e punës dhe të garantojë barazinë kontribuese mes subjekteve private.
Skema e kompensimit është menduar si një ndërhyrje e përkohshme financiare, që synon të neutralizojë rritjen e kostove operative për bizneset gjatë fazës së adaptimit me pagën e re minimale. Kjo ndërhyrje pritet të krijojë një efekt zbutës në tregun e punës dhe të ndihmojë subjektet private të përballojnë gradualisht kostot e reja të punësimit.
Efekti financiar i këtij vendimi është përllogaritur në buxhetin e shtetit për vitin 2026 në vlerën 1 miliard lekë. Fondi do të përdoret për periudhën janar–shtator 2026 dhe do të mbulohet nga programi buxhetor “Tregu i Punës”.
Për zbatimin e skemës do të angazhohen Ministria e Ekonomisë dhe Inovacionit, Agjencia Kombëtare e Punësimit dhe Aftësive dhe Drejtoria e Përgjithshme e Tatimeve, të cilat do të ndjekin procedurat për përfitimin e kompensimit nga ana e subjekteve që plotësojnë kriteret.
Në bazë të këtij vendimi, qeveria synon të balancojë efektet e rritjes së pagës minimale duke mbështetur njëkohësisht punonjësit dhe bizneset, në mënyrë që rritja e të ardhurave të punonjësve të mos shoqërohet me rritje të presionit financiar mbi aktivitetin e ndërmarrjeve. /ekofin.al
Artikull i Ekofin.al
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke
cituar “Ekofin.al”, shoqëruar me linkun e artikullit origjinal.
