Në mbështetje të ligjit “Për sigurimet shoqërore në Republikën e Shqipërisë”, të ndryshuar, me propozimin e ministrit të Financave dhe Ekonomisë, Këshilli i Ministrave miratoi sot koeficientin e indeksimit të bazës së vlerësuar të 2021 për llogaritjen e pensioneve.
Sipas relacionit që shoqëron këtë vendim, miratimi i indeksimit të bazës së vlerësuar të vitit 2021, me indeksin 8.9% të llogaritur bëhet sipas kritereve të përcaktuara të ligjit “Për sigurimet shoqërore në Republikën e Shqipërisë”, të ndryshuar.
Indeksi i përcaktuar sipas këtij vendimi, aplikohet për rivlerësimin e bazës së vlerësuar të arritur nëpërmjet kontributeve të derdhura dhe rivlerësimeve të tyre, të kryera deri në vitin 2021, dhe zbatohet për efekt të llogaritjes së shumës fillestare mujore të pensioneve që do të caktohet me datë fillimi nga data 1 korrik 2023 e në vazhdim.
Sipas vendimit, indekset akumulative të bazës së vlerësuar, të arritur nëpërmjet pagave të periudhës 1994-2021, referuar kontributeve të derdhura sipas muajve në këtë periudhë dhe pagave referuese sipas punëve dhe profesioneve, e përcaktuar me vendimin e Këshillit të Ministrave, “Për përcaktimin e pagave referuese për llogaritjen e pensioneve”, të ndryshuar, sipas viteve, janë sipas shtojcës I, që i bashkëlidhet këtij vendimi.
Pas aplikimit të indeksit të vitit 2021, baza e vlerësuar për efekt të llogaritjes së shumës fillestare mujore të pensioneve, që do të caktohen me datë fillimi nga data 1 korrik 2023, nuk mund të jetë më e lartë se: trefishi i pagës minimale në shkallë vendi, prej 40 000 lekësh, për pagat e periudhës nga viti 1994 deri në 31.12.2001; paga maksimale në shkallë vendi, prej 176 416 lekësh, e përcaktuar për pagat nga viti 2002 e në vazhdim.
Efektet financiare, që rrjedhin nga zbatimi i këtij vendimi për zbatimin e formulës së caktimit të pensioneve, aplikohen vetëm për pensionet që caktohen me datë fillimi nga data e hyrjes në fuqi të këtij vendimi e në vazhdim dhe përballohen brenda buxhetit vjetor të miratuar për Institutin e Sigurimeve Shoqërore.
Ky vendim hyn në fuqi pas botimit në “Fletoren zyrtare” dhe i shtrin efektet financiare nga data 1 korrik 2023.
