Sipas të dhënave të publikuara nga INSTAT, në muajin shtator, Shqipëria raportoi një rënie të eksporteve të mallrave prej -8,5%, duke arritur në 31 miliardë lekë, krahasuar me të njëjtën periudhë të vitit të kaluar. Ndërkohë, importet e mallrave arritën vlerën 71 miliardë lekë, me një ulje prej -3,1%. Kjo ka rezultuar në një deficit tregtar prej 40 miliardë lekë, që është rritur me 1,5% krahasuar me shtatorin e vitit të kaluar.
Gjatë këtij nëntëmujori, eksportet kanë arritur në 286 miliardë lekë, duke shënuar një ulje prej -14,2%, ndërsa importet kanë arritur në 666 miliardë lekë, me një rritje prej 2,4%. Deficiti tregtar për këtë periudhë është rritur me 19,8%.
Grupet kryesore që kanë ndikuar negativisht në eksporte janë “Tekstile dhe këpucë”, “Minerale, lëndë djegëse, energji elektrike” dhe “Materiale ndërtimi dhe metale”. Në anën pozitive, grupet si “Ushqime, pije, duhan” dhe “Makineri, pajisje dhe pjesë këmbimi” kanë kontribuar me rritje të lehtë.
Sa i përket importeve, rëniet kanë ardhur kryesisht nga “Minerale, lëndë djegëse, energji elektrike” dhe “Tekstile dhe këpucë”, ndërsa rritje është vënë re në importet e “Makinerive dhe pajisjeve”.
Analiza e shkëmbimeve tregtare sipas vendeve partnere tregon se eksportet drejt Italisë dhe Kosovës kanë pësuar rënie të dukshme, ndërsa eksportet drejt Spanjës, Kinës dhe SHBA-së kanë shënuar rritje. Importet nga Italia dhe Zvicra gjithashtu kanë rënë, ndërsa ato nga Kina, Greqia dhe Turqia janë rritur.
Tregtia me vendet e Bashkimit Evropian mbetet e rëndësishme, duke përfaqësuar 56,8% të gjithë shkëmbimeve tregtare, me Italinë si partnerin kryesor. Të dhënat tregojnë se Shqipëria vazhdon të përballet me sfida në eksportet e saj, ndërsa importet vazhdojnë të rriten. /ekofin.al
