Në tremujorin e tretë të vitit 2021, ndërhyrjet e Bankës së Shqipërisë në tregun e parasë konsistuan në operacione të tregut të hapur për injektim likuiditeti.
Injektimi mesatar ditor nëpërmjet operacioneve injektuese të likuiditetit me maturim 1-13 javë, ka qenë në masën 42.14 miliardë lekë, kundrejt mesatarisht 34.06 miliardë lekë në 6 muajt e parë të vitit dhe e ngjashme me tremujorin e tretë të vitit 2020 në 40.03 miliardë lekë.
Kërkesa e bankave për likuiditet në operacionet e Bankës së Shqipërisë është luhatur gjatë periudhës në vlerën 34-53 miliardë lekë dhe mbi nivelin 40 miliardë lekë prej mesit të muajit korrik e deri në fund të periudhës, duke shënuar nivelet maksimale në fund të periudhës së Rezervës së Detyruar gjatë muajit gusht.
Nevoja për likuiditet e bankave ka qenë 36.9 miliardë lekë në fillim të periudhës dhe 44.7 në fund të saj, ku edhe një herë, rritja e parasë në qarkullim për deri në 10.60 miliardë lekë deri në mes të muajit shtator ka qenë faktori kryesor i rritjes së mungesës.
