Agjencia e Prokurimit Publik (APP) ka evidentuar një tjetër rast me shkelje në procedurat e prokurimit në sektorin shëndetësor. Pas vendimeve të mëparshme për Spitalin Psikiatrik të Elbasanit dhe Spitalin “Shefqet Ndroqi” në Tiranë, këtë herë në qendër të monitorimit është vendosur Spitali Rajonal i Durrësit, duke forcuar përshtypjen se institucionet spitalore po shfaqen gjithnjë e më shpesh në listën e problematikave të APP-së.
Sipas vendimit nr. 36, datë 22 korrik 2026, APP ka monitoruar një kontratë për furnizim me mallra, pas një ankese të paraqitur nga një palë e tretë. Nga verifikimet ka rezultuar se autoriteti kontraktor nuk ka provuar se janë kryer kontrollet e nevojshme për të garantuar që mallrat e dorëzuara përmbushnin specifikimet teknike të përcaktuara në dokumentet e tenderit.
Një tjetër konstatim i rëndësishëm lidhet me mungesën e verifikimit të deklaratës së operatorit ekonomik për prodhuesin e mallit, dokument mbi bazën e të cilit kompania ishte shpallur fituese e procedurës së prokurimit. APP evidenton gjithashtu se Spitali Rajonal i Durrësit nuk ka dëshmuar hartimin e formularit të raportimit për zbatimin e kontratës, një detyrim i parashikuar nga legjislacioni për prokurimin publik.
Për këto shkelje, APP ka vendosur t’i propozojë autoritetit kontraktor marrjen e masave disiplinore ndaj katër personave përgjegjës, duke vlerësuar se janë konstatuar mangësi në administrimin dhe monitorimin e kontratës.
Rasti i Durrësit nuk është i izoluar. Gjatë këtij muaji, APP ka nxjerrë vendime edhe ndaj Spitalit Psikiatrik të Elbasanit dhe Spitalit Universitar “Shefqet Ndroqi”, ku monitorimet kanë evidentuar problematika në procedurat e prokurimit dhe administrimin e kontratave. Kjo krijon një tablo shqetësuese, pasi institucionet shëndetësore po shfaqen me një frekuencë të lartë në listën e shkelësve të procedurave.
Edhe pse rastet janë të ndryshme dhe lidhen me procedura të veçanta, përsëritja e tyre ngre pikëpyetje mbi funksionimin e mekanizmave të kontrollit të brendshëm në spitalet publike, veçanërisht në fazën e zbatimit të kontratave. Në një sektor ku prokurimet lidhen drejtpërdrejt me furnizimin me pajisje, barna dhe materiale mjekësore, respektimi i standardeve ligjore dhe teknike është thelbësor jo vetëm për administrimin e fondeve publike, por edhe për garantimin e cilësisë së shërbimit ndaj pacientëve. /ekofin.al
