Drejtori i Përgjithshëm i Drejtorisë së Përgjithshme për Zgjerimin në Komisionin Europian, Gert Jan Koopman, deklaroi sot në Parlamentin Europian se, deri në qershor, niveli i pritshëm i zbatimit të reformave në kuadër të Planit të Rritjes për Ballkanin Perëndimor arrin rreth 80% për Shqipërinë dhe Malin e Zi, 50% për Maqedoninë e Veriut dhe 35% për Serbinë.
“Kur u takuam në janar, konstatuam se, ndonëse kishte përparim, ai ishte i ngadaltë. Tani jam i kënaqur që mund t’ju raportoj se rreth 90% e të gjithë hapave ose janë përmbushur plotësisht, ose janë në proces, ndërsa sipas vlerësimeve tona, 57% e tyre ishin realizuar deri në qershor të këtij viti. Duhet thënë se ka dallime të konsiderueshme në rajon, ku Mali i Zi dhe Shqipëria pritet të arrijnë nivele zbatimi prej 80%, çka pasqyron edhe momentin e tyre shumë të rëndësishëm në rrugën drejt BE-së”, tha Koopman.
Ai shtoi se Maqedonia e Veriut, gjatë muajve të fundit, e ka përshpejtuar dhe thelluar ndjeshëm angazhimin. Tashmë pritet që norma e zbatimit të saj të kalojë 50%, duke ngushtuar me shpejtësi diferencën.
“Serbia, e cila ndodhet në një nivel shumë më të ulët, ka treguar gjithashtu angazhim, ndonëse më selektiv. Realizimi është rreth 35%, ndërsa puna vazhdon për 85% të hapave. Kohët e fundit, Serbia i ka kushtuar gjithashtu shumë më tepër vëmendje zbatimit të Instrumentit”, tha Koopman.
Kosova mbetet shumë prapa për shkak të bllokimeve të brendshme politike, të cilat kanë penguar miratimin e legjislacionit të rëndësishëm.
“Megjithatë, që prej zgjedhjeve të qershorit të këtij viti, shohim se Kosova ka nisur të ndërtojë stabilitetin e nevojshëm institucional dhe, për këtë arsye, presim një nivel më të lartë zbatimi”, deklaroi Koopman.
Vendi që paraqet sfidat më të mëdha është Bosnjë-Hercegovina, për shkak të bllokimeve të brendshme politike. Sipas Koopman, Komisioni i ka shkurtuar tashmë fondet e parashikuara për Bosnjë-Hercegovinën dhe propozon që, në një fazë të parë, këto mjete të transferohen në seksionin e Këshillit Europian të Inovacionit për Ballkanin Perëndimor, në mënyrë që fondet të mbeten në rajon.
I pyetur për situatën e pagesave ndaj Serbisë, Koopman tha se Komisioni po verifikon ende nëse është përmbushur një nga dy nivelet e kushtëzimit, konkretisht kushtet e përgjithshme që lidhen me sundimin e ligjit.
“Fakti që deri tani, që prej janarit, nuk kemi kryer pagesa tregon se nuk kemi qenë plotësisht të bindur se ky kusht është përmbushur. Ne vazhdojmë ta monitorojmë situatën. Gjendja, siç është përshkruar në dokumentin tonë jozyrtar për sundimin e ligjit dhe në raportin e zgjerimit të vitit të kaluar, nuk është e përsosur. Ajo është larg të qenit e kënaqshme, siç e dini dhe siç e ka theksuar edhe Parlamenti”, tha Koopman.
Megjithatë, ai shtoi se Komisioni ka konstatuar se, gjatë muajve të fundit, vendi ka nisur t’i trajtojë më seriozisht disa nga situatat problematike. Sipas tij, kohët e fundit janë ndërmarrë disa hapa të rëndësishëm, përfshirë nisjen, gjatë fundjavës së kaluar, të punës së këshillit të REM-it, autoritetit mbikëqyrës të medias./Përshtati nga European Western Balkans, ekofin.al
