Në cilin vend vlejnë më shumë paratë e pushimeve? Një analizë e Euronews Business mbi çmimet në shtatë prej destinacioneve më të njohura turistike të Evropës tregon se Turqia është në tërësi vendi më i lirë, por njëkohësisht më i shtrenjti për pijet alkoolike, ndërsa Portugalia ofron raportin më të mirë mes çmimit dhe vlerës për akomodimin dhe restorantet.
Një vakt buzë detit, një dhomë hoteli apo një gotë verë mund të kushtojnë shuma shumë të ndryshme, në varësi të vendit ku kalohen pushimet verore.
Për të krahasuar çmimet në shtatë prej destinacioneve më të njohura të pushimeve në Evropë, Euronews Business analizoi të dhënat e Eurostat për nivelet e çmimeve të një sërë mallrash dhe shërbimesh.
Shifrat nuk tregojnë koston e plotë të një pushimi, por pasqyrojnë mesataret kombëtare. Çmimet në zonat turistike më të frekuentuara mund të jenë ndjeshëm më të larta. Për shembull, një dhomë hoteli në Athinë dhe një tjetër në ishullin Kos mund të kenë çmime të ndryshme, por të dyja përfshihen në mesataren kombëtare të Greqisë.
Krahasimi përfshin shtatë vende.
Niveli i përgjithshëm i çmimeve: Turqia është më e lira
Disa indekse të niveleve të çmimeve krahasojnë koston e mallrave dhe shërbimeve të ndryshme, si ushqimet, pijet, veshjet dhe hotelet. Indeksi i nivelit të çmimeve për shpenzimet përfundimtare të konsumit të familjeve, i njohur si HFCE, pasqyron nivelin e përgjithshëm të çmimeve të mallrave dhe shërbimeve të konsumit.
Me fjalë të thjeshta, nëse e njëjta shportë mallrash dhe shërbimesh kushton mesatarisht 100 euro në Bashkimin Europian, sa do të kushtonte ajo në secilin vend?
Turqia është vendi më i lirë në tërësi, bazuar në çmimet e më shumë se 2 mijë mallrave dhe shërbimeve. Një shportë që kushton 100 euro në BE kushton vetëm 59.6 euro në Turqi, që do të thotë se është 40.4% më e lirë se mesatarja e Bashkimit Europian.
Franca është vendi më i shtrenjtë ndër shtatë destinacionet, me një nivel prej 100.3 eurosh, pak mbi mesataren e BE-së. Pesë vendet e tjera janë nën mesataren europiane: Italia me 97.1 euro, Spanja me 91.6 euro, Greqia me 87.4 euro, Portugalia me 86.6 euro dhe Kroacia me 78.4 euro.
Ku janë më të lira hotelet dhe restorantet?
Kategoria e Eurostat “restorante dhe hotele” krahason koston e ushqimit jashtë shtëpisë dhe të qëndrimit në struktura akomoduese me pagesë. Ky është një nga treguesit më të rëndësishëm për udhëtarët.
Franca është vendi më i shtrenjtë ndër shtatë destinacionet, me një indeks të nivelit të çmimeve prej 116, e ndjekur nga Italia me 110.8.
Me fjalë të tjera, nëse mesatarja e BE-së për këtë kategori vendoset në nivelin 100 euro, e njëjta shportë shërbimesh restoranti dhe akomodimi do të kushtonte 116 euro në Francë dhe 110.8 euro në Itali.
Portugalia është vendi më i lirë, ku kjo shportë kushton 73.6 euro. Kjo do të thotë se çmimet janë 26.4% më të ulëta se mesatarja e Bashkimit Europian.
Edhe Turqia qëndron nën nivelin 80, me një indeks çmimesh prej 78.3.
Kroacia, me indeks 89.6, është pak më e shtrenjtë se Greqia, me 86.1, dhe Spanja, me 85.4.
Turqia dhe Spanja nën mesataren e BE-së për çmimet e ushqimeve
Çmimet e ushqimeve janë relativisht të ngjashme në shtatë vendet e krahasuara, me një përjashtim të qartë: Turqinë.
Franca është vendi më i shtrenjtë, megjithëse çmimet janë vetëm 7.9% mbi mesataren e Bashkimit Europian. Një shportë ushqimore që kushton 100 euro në BE do të kushtonte 107.9 euro në Francë.
Në Turqi, e njëjta shportë do të kushtonte vetëm 75.6 euro.
Spanja është i vetmi vend tjetër nën mesataren e BE-së, me një nivel prej 94.6 eurosh, ndërsa çmimet në vendet e tjera janë lehtësisht më të larta se mesatarja europiane.
Alkooli kushton më shumë se dyfishi i mesatares së BE-së në Turqi
Pijet alkoolike shfaqin një nga diferencat më të mëdha të çmimeve në këtë krahasim.
Turqia dallon si destinacioni më i shtrenjtë: pijet alkoolike kushtojnë më shumë se dyfishi i mesatares së BE-së, me një indeks të nivelit të çmimeve prej 210.2.
Greqia renditet shumë më pas, në vendin e dytë, me indeks 154, e ndjekur nga Kroacia me 133.9.
Në skajin tjetër të renditjes, Italia është vendi më i lirë, me indeks 81.9, ndërsa edhe Spanja mbetet nën mesataren e BE-së, me 90.1.
Çmimet në Francë dhe Portugali janë shumë më afër mesatares europiane, përkatësisht me indekse 100.9 dhe 107.1.
Diferencat janë më të vogla për pijet joalkoolike, megjithëse mbeten të dukshme. Çmimet variojnë nga një indeks prej 81.8 në Itali deri në 133.5 në Kroaci.
Turqia ka çmimet më të ulëta të duhanit
Nivelet e çmimeve të duhanit ndryshojnë ndjeshëm, nga 25.4 euro në Turqi deri në 191.1 euro në Francë.
Të gjitha vendet e tjera janë gjithashtu nën mesataren e BE-së, por asnjë nuk i afrohet nivelit të ulët të Turqisë.
Vendi i dytë më i lirë është Kroacia, me një indeks prej 64.6, megjithëse çmimet mbeten shumë më të larta se në Turqi.
Për ata që udhëtojnë me transport publik, Turqia është vendi më i lirë, me një indeks prej 68.3, kundrejt mesatares së BE-së prej 100.
Vetëm Franca e tejkalon mesataren europiane, me indeks 112.8.
Portugalia, Spanja dhe Kroacia janë pranë nivelit 80, ndërsa Greqia qëndron pak nën mesataren e Bashkimit Europian.
Çmimet e produkteve të detit nuk ndryshojnë shumë
Për turistët që preferojnë produktet e detit dhe udhëtojnë drejt Europës Jugore, diferencat e çmimeve janë relativisht të vogla.
Indeksi varion nga 95.4 në Portugali deri në 112.7 në Greqi.
Të ardhurat individuale ose familjare nuk janë përfshirë në këto krahasime. Për këtë arsye, për udhëtarët nga vendet me të ardhura më të larta, diferencat e çmimeve mund të mos duken aq të rëndësishme sa për turistët që vijnë nga vende me të ardhura më të ulëta./Përshtati nga Euronews, ekofin.al
