Evropa Lindore regjistroi rritjen më të shpejtë të numrit të milionerëve në dollarë në terma përqindjeje, ndërsa Mbretëria e Bashkuar, Franca dhe Spanja u renditën menjëherë pas Shteteve të Bashkuara për numrin e milionerëve të rinj.
Gati një milion persona iu shtuan në vitin 2025 grupit të milionerëve në dollarë amerikanë në mbarë botën, sipas UBS. Kjo është e barabartë me më shumë se 2,680 milionerë të rinj në ditë, 112 në orë ose pothuajse dy në çdo minutë.
Evropa përfaqësoi një pjesë të konsiderueshme të rritjes së regjistruar jashtë Shteteve të Bashkuara. Mbretëria e Bashkuar shtoi mesatarisht 118 milionerë të rinj në dollarë në ditë, ndërsa Franca 95.
Sipas kursit aktual të këmbimit, 1 milion dollarë është i barabartë me rreth 875 mijë euro.
Në terma përqindjeje, megjithatë, vendet e Europës Lindore shënuan rritjen më të shpejtë. Pesë vendet e para në renditjen globale të 30 vendeve me rritjen më të lartë ishin të gjitha evropiane, duke përfshirë shtete anëtare të Bashkimit Evropian, vende kandidate për në BE, anëtarë të Shoqatës Evropiane të Tregtisë së Lirë, EFTA, dhe Mbretërinë e Bashkuar.
Lituania regjistroi rritjen më të lartë, me 8%, duke shtuar 921 milionerë të rinj në dollarë gjatë vitit 2025.
Turqia u rendit e dyta, me një rritje prej 6.4% dhe 5,650 milionerë të rinj. Letonia shënoi një rritje prej 5.7%, duke shtuar 1,131 milionerë.
Në Hungari, numri i milionerëve u rrit me 5.3%, ose me 1,349 persona. Irlanda u rendit e pesta, me një rritje prej 5.2%, por shtoi ndjeshëm më shumë persona në grupin e milionerëve krahasuar me vendet e renditura më lart, gjithsej 9,491 milionerë të rinj.
Rritja arriti në 4% në Poloni dhe në 3.5% në Greqi.
Raporti vëren se rritja e numrit të milionerëve varet, deri në njëfarë mase, nga fakti se sa pranë pragut prej 1 milion dollarësh ndodheshin këta persona një vit më parë.
Mbretëria e Bashkuar, Franca dhe Spanja pas SHBA-së në numër absolut
Numri i milionerëve në dollarë u rrit gjithashtu me 3.1% në Spanjë, 2.4% në Itali, 1.8% në Mbretërinë e Bashkuar, 1.5% në Francë, 1% në Zvicër dhe 0.9% në Gjermani.
Megjithatë, numrat absolutë japin një panoramë më të qartë për këto vende, pasi ato kanë tashmë një popullsi të madhe milionerësh, çka sjell norma relativisht më të ulëta rritjeje.
Shtetet e Bashkuara regjistruan shtimin më të madh të numrit të milionerëve, me 441,078 persona të rinj, pothuajse gjysmën e rritjes globale.
Në Evropë, Mbretëria e Bashkuar shtoi më shumë se 43 mijë milionerë të rinj në dollarë gjatë vitit të kaluar, ndërsa Franca dhe Spanja shtuan secila më shumë se 32 mijë.
Italia dhe Gjermania u renditën gjithashtu mes dhjetë vendeve të para në botë, duke shtuar secila më shumë se 24 mijë milionerë të rinj.
Pesë ekonomitë më të mëdha të Evropës përfshihen të gjitha në dhjetëshen e parë globale. Të gjitha vendet e tjera evropiane shtuan më pak se 10 mijë milionerë të rinj.
Në dhjetëshen e parë globale përfshihen gjithashtu Japonia, me 31,428 milionerë të rinj, India me 31,033, Australia me 25,089 dhe Rusia me 21,951.
Sa milionerë të rinj shtohen çdo ditë
Kur këto shifra përllogariten në bazë ditore, përmasat e rritjes bëhen edhe më të dukshme. Gjatë vitit 2025, mesatarisht 1,208 persona në ditë iu bashkuan grupit të milionerëve në Shtetet e Bashkuara, ose rreth 47 persona në orë.
Mes vendeve evropiane, Mbretëria e Bashkuar shtoi mesatarisht 118 milionerë të rinj në ditë, ose 4.5 në orë.
Franca regjistroi 95 milionerë të rinj në ditë dhe Spanja 90. Italia shtoi 67 milionerë të rinj në ditë, ndërsa Gjermania 66.
“Më shumë njerëz po ngjiten në shkallën e pasurisë, grupi në majë po zgjerohet dhe rritja po vazhdon në një numër jashtëzakonisht të gjerë tregjesh”, thuhet në raport.
Asnjë prej 56 vendeve dhe tregjeve të përfshira në kampionin e UBS nuk e mbylli vitin 2025 me më pak milionerë sesa kishte në fillim të tij.
Më shumë se 40% e milionerëve në dollarë në botë jetojnë në Shtetet e Bashkuara. Bëhet fjalë për mbi 23.6 milionë persona, nga rreth 57.5 milionë milionerë që përfshin kampioni i UBS.
Evropa Perëndimore ka pak më pak se 15 milionë milionerë në dollarë, ose rreth 25% të totalit.
Çfarë tregojnë këto shifra?
Raporti thekson se numri i milionerëve në një vend ose treg të caktuar nuk është gjithmonë pasqyrim i madhësisë së tij, fuqisë ekonomike apo nivelit mesatar të pasurisë për banor.
Shumë varet edhe nga faktorë të tjerë përtej fuqisë së ekonomisë, si niveli i pronësisë së banesave, kursimet private për pension dhe mundësia për të përfituar lehtësi tatimore për kursimet dhe investimet.
Raporti i UBS e përkufizon pasurinë neto si vlerën e aktiveve financiare dhe reale, kryesisht të banesave, në pronësi të individëve, pasi prej saj zbriten borxhet.
Termi “milioner në dollarë” nënkupton një person me pasuri neto prej të paktën 1 milion dollarësh, jo domosdoshmërisht me të ardhura vjetore në këtë nivel./Përshtati nga Euronews, ekofin.al
