Enti Rregullator i Energjisë (ERE) ka nxjerrë për konsultim kontratën e re të shitblerjes së energjisë elektrike ndërmjet Korporatës Elektroenergjetike Shqiptare (KESH) dhe Furnizuesit të Shërbimit Universal (FSHU). Dokumenti synon të përshtatë marrëdhënien mes dy kompanive publike me zhvillimet e fundit ligjore dhe me funksionimin e tregut të energjisë në Shqipëri.
Në thelb, kontrata përcakton rregullat sipas të cilave KESH do të furnizojë FSHU-në me energjinë e nevojshme për të mbuluar konsumin e klientëve që përfitojnë shërbimin universal, pra familjeve dhe kategorive të tjera që furnizohen me tarifa të rregulluara.
Një nga risitë kryesore është saktësimi i detyrimeve të secilës palë. KESH angazhohet të sigurojë sasinë e energjisë sipas programeve të miratuara, ndërsa FSHU duhet të planifikojë në mënyrë sa më të saktë kërkesën për energji dhe të respektojë afatet e pagesave. Kjo synon të ulë devijimet mes energjisë së planifikuar dhe asaj të konsumuar, duke kufizuar kostot shtesë që krijohen në tregun balancues.
Kontrata parashikon gjithashtu procedura më të detajuara për matjen e energjisë së dorëzuar, verifikimin e të dhënave, faturimin dhe zgjidhjen e mosmarrëveshjeve. Për herë të parë, një pjesë e konsiderueshme e dispozitave harmonizohet me rregullat e reja të tregut të energjisë dhe me mekanizmat e balancimit që po zbatohen gradualisht në vend.
Një element i rëndësishëm është edhe forcimi i disiplinës financiare. Dokumenti përcakton afate të qarta për pagesat, interesat në rast vonesash dhe procedurat që ndiqen nëse njëra nga palët nuk përmbush detyrimet kontraktore. Kjo pritet të përmirësojë likuiditetin mes operatorëve publikë dhe të shmangë krijimin e detyrimeve të prapambetura.
Nga pikëpamja ekonomike, kontrata rrit parashikueshmërinë në marrëdhëniet mes KESH dhe FSHU. Një planifikim më i saktë i sasive të energjisë dhe një ndarje më e qartë e përgjegjësive ndihmojnë në uljen e kostove operative dhe në një administrim më efikas të energjisë së prodhuar, veçanërisht në periudhat kur vendi detyrohet të importojë energji.
Për konsumatorët fundorë, ndryshimet janë kryesisht administrative dhe nuk sjellin automatikisht ndryshim të çmimit të energjisë elektrike./ekofin.al
