Komisioni Evropian publikoi të martën një deklaratë zyrtare, ku paraqet paketën financiare për anëtarësimin e Malit të Zi në Bashkimin Evropian, një hap që vjen pas dakordësisë së shteteve anëtare për të nisur hartimin e Traktatit të Anëtarësimit të vendit.
Paketa përcakton rregullimet buxhetore që do të zbatohen sapo Mali i Zi të bëhet shtet anëtar i BE-së, duke siguruar integrimin e tij në politikat dhe programet europiane, si përfitues i fondeve të unionit, por edhe si kontribuues në buxhetin e përbashkët.
Sipas Komisionit Evropian, ndikimi neto i anëtarësimit të Malit të Zi në buxhetin e Bashkimit Europian vlerësohet në rreth 3.2 miliardë euro. Institucioni thekson se kjo shumë përkthehet në më pak se 1 euro në vit për çdo qytetar të BE-së.
Paketa financiare lidhet me Kapitullin 33 të negociatave të anëtarësimit, i cili trajton çështjet financiare dhe buxhetore. Dokumenti synon të japë një pasqyrë të qartë të efekteve që do të ketë zgjerimi i unionit me Malin e Zi dhe të garantojë një tranzicion sa më të qetë pas anëtarësimit.
Komisioni nënvizon se llogaritjet janë bazuar në propozimin për buxhetin shumëvjeçar të Bashkimit Evropian dhe kanë si qëllim shmangien e ndërprerjeve në financim dhe minimizimin e kostove administrative gjatë periudhës së integrimit.
Mali i Zi konsiderohet aktualisht vendi kandidat më i avancuar në procesin e zgjerimit të Bashkimit Evropian. Vendi ka hapur të gjithë kapitujt e negociatave dhe ka mbyllur një pjesë të konsiderueshme të tyre, ndërsa synon të përfundojë negociatat deri në fund të vitit 2026.
Publikimi i kësaj pakete financiare konsiderohet një tjetër sinjal se Mali i Zi po hyn në fazën përfundimtare të procesit të anëtarësimit dhe po avancon më shpejt se vendet e tjera të Ballkanit Perëndimor, përfshirë Shqipërinë, në rrugën drejt anëtarësimit të plotë në Bashkimin Evropian.
