Apple po planifikon të lançojë produktet e reja më 10 shtator, ku parashikohen të prezantohen iPhone-ët, orët dhe AirPods më të fundit, raporton Bloomberg News.
Kompania po bën përgatitjet për atë datë, edhe pse koha nuk është shpallur ende. Telefonat e rinj pritet të dalin në shitje në datën 20 shtator, në përputhje me qasjen tipike të Apple në vitet e fundit, thuhet në raport. Apple nuk iu përgjigj menjëherë një kërkese të Reuters për koment.
Analistët shohin një cikël të fortë përmirësimi për serinë iPhone 16 dhe Apple pritet të nisë atë që ata e quajnë përmirësimin më të madh të softuerit për iPhone. Ai përfshin veçori të inteligjencës artificiale dhe vjen në një kohë kur rivalët si Samsung kanë qenë më të shpejtë për të nxjerrë shërbime të ngjashme.
Lançimet e reja vijnë pasi Apple parashikon më shumë fitime, duke vënë bast mbi Inteligjencën Artificiale për të tërhequr blerës edhe pse biznesi i saj i përgjithshëm në Kinë zhgënjeu në tremujorin e tretë. Shitjet në tregun e tretë më të madh të Apple në Kinë ranë 6.5%, më shumë se pritjet për një rënie prej 2.4%, sipas Visible Alpha.
Gjatë konferencës së saj vjetore të zhvilluesve në qershor, Apple zbuloi një strategji të shumëpritur të inteligjencës artificiale, duke integruar teknologjinë e saj të re “Apple Intelligence” në grupin e saj të aplikacioneve, duke përfshirë Siri dhe duke sjellë chatbotin e OpenAI ChatGPT në pajisjet e saj.
