Publikohet lista e aplikimeve fituese dhe jo fituese të fazës së parë për programin social “Subvencionimi i Interesave të Kredisë”, i njohur ndryshe si programi i kredive të buta.
Ekofin.al disponon të dyja listat, si të aplikimeve fituese, ku rezultojnë 2871 persona, ashtu edhe ato jofituese, që janë 1538 persona.
Programi mbështetet në ligjin “Për strehimin social” dhe në vendimin e Këshillit Bashkiak të Tiranës, datë 26 shkurt 2026, për miratimin e sistemit të pikëzimit, nivelit minimal dhe maksimal të të ardhurave, nivelit të kreditimit dhe dokumentacionit që duhet të plotësojnë individët apo familjet për t’u trajtuar me këtë skemë.
Në njoftim sqarohet se për individët që kanë aplikuar brenda së njëjtës certifikatë familjare, dokumentacioni duhet të dorëzohet vetëm nga njëri prej aplikantëve, për të gjithë anëtarët madhorë sipas certifikatës familjare.
Po ashtu, individët apo familjet që kanë rezultuar përfituese nga ky program në thirrjen e realizuar gjatë vitit 2025, për të cilët është miratuar shtyrja e afatit nga Enti Kombëtar i Banesave, nuk mund të aplikojnë në këtë thirrje.
Aplikantët që nuk janë kualifikuar si përfitues në fazën e parë kanë të drejtë të paraqesin ankim brenda 5 ditëve pune nga data e publikimit të listës. Afati i ankimit është nga 10 qershori deri më 16 qershor 2026.
Ankimi mund të paraqitet elektronikisht përmes portalit qeveritar e-Albania, duke zgjedhur shërbimin “Kërkesë për të përfituar nga programet e strehimit social”, ose fizikisht pranë sporteleve të shërbimit të sektorit të informimit dhe shërbimeve publike.
Bashkia sqaron se faza e dytë, që lidhet me dorëzimin e dokumentacionit nga aplikantët e kualifikuar, do të vijojë me një njoftim të dytë publik. /ekofin.al
Lista-fitues-dhe-jofitues-te-fazes-se-pare
