Administrata tatimore ka identifikuar individët të cilët japin banesa me qira afatshkurtër dhe krijojnë të ardhura përmes platformës AirBnB.
Në një njoftim zyrtar të dërguar individëve që rezultojnë të kenë përfituar të ardhura nga këto aktivitete, Drejtoria e Përgjithshme e Tatimeve, u bën thirrje qytetarëve të deklarojnë fitimet në përputhje me legjislacionin në fuqi.
Sipas njoftimit, të dhënat janë siguruar përmes bashkëpunimit me platformën AirBnB, duke mundësuar identifikimin e personave që kanë realizuar të ardhura nga qiradhënia afatshkurtër. Administrata vlerëson ata që kanë kryer deklarimet e sakta qoftë nëpërmjet Deklaratës Vjetore të të Ardhurave Personale si individ, apo nëpërmjet Deklaratës Vjetore të të Ardhurave të Biznesit si subjekt, ndërsa bën apel për ata që nuk kanë kryer deklarimin, që të përmbushin detyrimet sa më shpejt.
Tatimet theksojnë gjithashtu se individët kanë mundësinë të korrigjojnë deklarimet e pasakta pa penalitete shtesë, nëse veprojnë në kohë.
Administrata Tatimore bën me dije se është aktualisht në fazën e analizës së të dhënave të deklaruara dhe paralajmëron se për të gjitha rastet e konstatuara me mosdeklarim apo pasaktësi në deklarim, do të kryhen rivlerësimet përkatëse dhe do të aplikohen penalitetet e parashikuara nga legjislacioni në fuqi.
Ky zhvillim vjen në kuadër të përpjekjeve për të rritur formalizimin e ekonomisë dhe për të siguruar një konkurrencë më të drejtë në tregun e akomodimit turistik.
Të dhënat më të fundit nga Administrata Tatimore, që i referohen vitit 2024 tregojnë se mbi 8,472 individë dhe subjekte kanë realizuar shitje të akomodimeve përmes platformës Airbnb në Shqipëri. Vlera totale e rezervimeve arriti në 3,8 miliardë lekë, ose rreth 40 milionë euro, ndërsa komisionet e platformës kapën vlerën 167,5 milionë lekë
Tashmë qiratë afatshkurtra janë kthyer në një biznes të mirëfilltë edhe për shumë individë të cilët marrin me qira afatgjatë struktura të ndryshme dhe më pas i japin me qira ditore, ndërsa një e ardhur ekstra për një segment tjetër qytetarësh të cilët kanë një apartament në pronësi në të cilin nuk banojnë dhe e punojnë atë përmes platformave Booking dhe AirBNB.
Tatimi që duhet të paguajnë qytetarët është 15 % mbi të ardhurat e akumulura./Scantv
