Në fund të vitit 2025, depozitat e sigurueshme në sistemin bankar arritën në 1,742 miliardë lekë, duke përbërë 94.9% të totalit të depozitave dhe duke shënuar një rritje vjetore prej 9.5% ose 151.8 miliardë lekë më shumë krahasuar me vitin 2024.
Sipas raportit vjetor të vitit 2025 të Agjencisë së Sigurimit të Depozitave, struktura e tyre dominohet nga depozitat në lekë me 47.7% dhe në euro me 47.1%, ndërsa dollari zë vetëm 3.7%.
Depozitat në lekë u rritën gradualisht gjatë vitit, duke arritur në 831.6 miliardë lekë në dhjetor, ndërsa ato në valutë përbëjnë 52.3% të totalit, me një vlerë prej rreth 910 miliardë lekësh. Luhatjet mujore kanë qenë të moderuara, me rritje më të fortë në janar për depozitat në lekë dhe në gusht për ato në valutë.
Peshën kryesore e mbajnë depozitat e individëve, të cilat arritën në 1,387.4 miliardë lekë ose 79.6% të totalit, me një rritje vjetore prej 8.8%. Brenda tyre, depozitat në lekë kontribuan më shumë në rritje, ndërsa depozitat në euro arritën në 631.9 miliardë lekë. Ndërkohë, depozitat në USD shënuan rritje të fortë në monedhën origjinale me 19%.
Të dhënat tregojnë se shumica e depozituesve mbeten të mbrojtur nga skema e sigurimit: 92.8% e individëve kanë depozita deri në nivelin e mbulimit prej 2.5 milionë lekësh. Në total, numri i depozituesve të siguruar arriti në rreth 2.9 milionë, ndërsa depozitat mbi këtë nivel u rritën ndjeshëm, duke kontribuar në zgjerimin e përgjithshëm të kursimeve në sistem./ekofin.al
